Aizawl: Tunlai khawvelin a buaipui natna chi khat Corona virus (Covid-19) vei nia rinhleh vanga Mizoram sawrkarin mi 10 te sample a lak result chu hriatkim a ni tawh a, an vai hian Covid-19 an vei lo tih finfiah a ni. Covid-19 enna khawl pawh lei tuma hmalak mek a ni a, proposal pawh peih a ni tawh. Zalen palaiin Integrated Disease Surveillance Programme (IDSP) state nodal officer Dr. Pachuau Lalmalsawma hnen atanga thu a dawn danin Mizoram atanga sample lak te hi Niced, Kolkata ah 2 leh a dang hi Gauhati Medical College ah thawn a ni a. Result hi a test tu lamin hna an ngah anih loh chuan result thawn tukah an hre tlangpui niin a sawi. Test kit an indaih leh daih loh zawhna chhangin tun dinhmunah chuan an indaih niin a sawi bawk. Covid-19 vanga thi lo awm se engtia sawngbawl tur nge ni dawn tih zawhna chu sawrkar laipuiin invui dan chungchangah ruahmanna a nei tih sawiin mahse Mizoramah chuan a ngial a ngana hman theih a nih a rinloh thu Dr. Pachuau Lalmalsawma chuan Zalen palai a hrilh a. "Central YMA te nen sawiho a, kan Mizo society nen inmila ruahmanna kan siam a ngai dawn a ni," a ti bawk. Zoram Medical College a ICU chu tihruah vek a ni a, Civil Hospital, Aizawl ICU khum 5 awm mek chu khum 21 awm theiha tihlen tum a ni. Veng leh khaw tinah Local Council leh Village Council te hmalaknain task force din vek a ni tawh bawk. Mizoram kawtchhuah pui ber Vairengte ah chuan zin chhuak mi engemaw zat awm mahse nidang ngaihtuahin an tlem hle a, hetih lai hian zirlai leh hmun danga hnathawka awm te an lo haw tam hle thung. Thudawn danin Vairengte gate kaltlang hian nitin chawhrualin mi 2800 vel in an paltlang niin an sawi. Mizoram sawrkarin ILP pekchhuah a tihtawp avangin Vairengte ah hian hnamdang lo lut an tlem a, haw an tam avang leh gate ah Covid-19 screening lo tih zel anih avangin nidang aiin awm rei a ngai thung. Covid-19 enna hi a hmaa hmun 1 chauha awm thin chu hmun 3/4 ah en anih tawh avangin screening neih tirha lirthei thui tak tak intlar ang kha chu a awm tawh lo a ni. Covid 19 chungchanga social media a thu vir vel a rintlak em? Thu leng vel: Khua a lum anga Covid 19 hi chu a reh mai ang. A tak ram: Covid 19 hi a la rei loa, zirbingna a la tlem hle. Nipui hmang mek Australia-ah te pawh a darh tho a, China-a khawlum tan tawhna hmunah te pawh a vei an awm tho. Khawvel thlang lamin nipui an hman laiin a chhak lamin thlasik kan hmang a, chuvangin a reh tak tak hun tur hi a sawi theih loh. Thu leng vel: Tui in zin hian coronavirus lakah a veng ang che. Tui i in tlem chuan virus chu i thawkna dawtah a lut ang a, i in tam chuan virus hrik chu i pumah a lut anga i puma acid in a ei hlum ang. A tak ram: Respiratory viruses ah hetiang hi a thawk tih hriat a la ni lo. Lo thawk pawh nise (a thawk chuang loa) an hnar atangin a la lut thei tho a, hei hi a dik lo a ni. Thu leng vel: I hnap a tuia, i khak a awm chuan hritlang saltiah tihna, covid 19 pneumonia chu khuh a ro, khak a awm lo. A tak ram: Hei hi a dik famkim lo. Hnaptui neih hian allergy, influenza leh a dangte a kawk thei a. Coronavirus vei tam ber hian khuh ro chu an nei ngei a, corona virus (Covid-19) pneumonia vei thenkhat te chuan khuhhnawng/ khak an nei tho a ni. Symptoms tlanglawn ber chu khawsik, khuhro, thawk harsa, kawthalo a ni a, a dang a awm thei lo tihna a ni lo a, khuh hnawng pawh 'rule out' ngawt theih lo ang a, mahse a ‘suggestible’ vak lo tihna. Thu leng vel: Tuilum chi al a kam thuah hian a veng. Tuilum hian virus hi a that a ni. A tak ram: Respiratory viruses zirbingna data en chuan tuilum chi al hi a thawh nachhan tur a awm lo, tui lum hian C 19 virus hi che thei loin a siam tihna tluk a ni a, chu chu a dik lo a ni. Thu leng vel: Thawk la la second 10 chhung thaw lo la, khuh lo, nuam tihlohna, awm tawt i neih loh chuan i chuap chu fibrosis (chuap khawng/ro) a la ni lo tihna a ni a, C 19 i vei lo tihna. A tak ram: C 19 virus kher ni lo, tu pawhin acute viral infection a neih chuah thawk laka thawk chelh chu khuh loin a har mai thei a, thawkna dawt lam zawk chu a sil (irritated) vang a ni a, hei hian chuap a khawng/ro lam a hawi lo hrim hrim a, chuap khawng/ro nei chuan an harsat hrim hrim bawk ang. Mahse second 10 thaw loa awm theih hian corona virus i vei lo tih a kawk hauh lo. Thu leng vel: Covid 19 vaccine hi an peih tep tawh A tak ram: Tunah hian ram hran hranah enchhin mek a ni chauh a, Kaiser Permanente Washington Health Research Institute ah March ni 16 khan mihring-ah enchhin tan chauh a ni a, mimir tana vaccine peih a nih hun tur hi a la hla hle a, kum khat a peih hman a nih chuan a rang hle a ngaih a ni ang. Zirtur: Thudiklo thehdarh hi a hlauhawma, website rintlak rawn tur a tam, social media rawn loin heng website emaw thuneitute/mithiam rawn zawk ang che. I kut sil chhen bawk la. Source: WHO,National Health Mission Mizoram, Associated Press, Economic Times, Times of India, Dr. Robert Legare Atmar, Baylor College of Medicine (CNN interview) and media reports