Aizawl: Mizoram Pradesh Congress Committee (MPCC) chuan Covid-19 hripui do kawngah Health Minister Dr. R.Lalthangliana chu a hlawhchham nia sawiin hripui do hlawhtling turin Mizoramin Health Minister thar a mamawh niin an sawi.

Nimin khan Aizawl Press Club-ah chanchinbumite kawmin MPCC thupuangtu Dr. Lallianchhunga chuan India ram state tam zawkah COVID-19 vei nasa taka an tlak hniam lai leh hri darh tur an thunun (control) theih tawh laiin Mizoramah chuan hri vei zat a tlahniam thei reng reng lo niin a sawi a. "Khawvela lockdown puang rei ber ni chunga kan dinhmun a danglam thei reng reng lo mai hi Congress Party chuan MNF sawrkar hlawhchhamna chiang takah kan ngai a ni," a ti. 

Dr. Lallianchhunga chuan sample test chungchangah sawrkar a hlawhchham nia sawiin, "Ministry of Home Affairs Order No. 40-3/2020-DM-I(A) Dated 23rd March 2021-ah chuan sample test zawng zawng atanga za zela 70 (70%) emaw, a aia tam chu RT-PCR hmanga test tur tih a ni a. Hetiang a nih lai hian Mizoramah chuan September 2, 2021 thlenga sample kan test tawh zawng zawng 882096 atanga 66.64% (sample 587886) chu test-na rintlak tawk lo, RAgT hmanga test a ni a. MHA-in 70% chin tal RT-PCR hmanga test tur a tih laiin Mizoramah chuan RT-PCR hmanga kan test chu 27.30% chiah a ni," a ti a. "Test-na rintlak tawk lo RAgT-a Mizoram kan innghat lui tlat hi Mizorama COVID-19 tlakhniam theih lohna chhanah Congress Party chuan kan ngai tlat a. Lunglei atanga MNF MLA thlan tlin ten Lunglei Civil Hospital a RT-PCR khawl bun tura sawrkar an nawr na ngam miah lo hi an demawm tak zetin kan hria a ni," a ti bawk.  
Covid-19 do kawngah Health Minister Dr. R.Lalthangliana chu a hlawhchham chiang hle tih sawiin, "Covid-19 dona kawnga MNF sawrkar hlawhchhamnaah hian a mawhphurtu lian ber chu Health Minister Dr. R. Lalthangliana a ni tih hi Congress Party ngaihdan a ni a. Lunglei a RT-PCR dah tur chungchanga tun thlenga harsatna a thlen nachhan bul ber pawh Health Minister tho hi a ni a. Damloh vang leh zirna sang pana state pawn a kal tur reng rengin RT-PCR test nei turin Mizoram hmun hrang hrang atangin ZMC pan khawm zel ala ngai hi Health Minister in a tihtur a tih that duh loh vang a ni tih a chiang hle a ni," a ti. Dr. Lallianchhunga chuan Health Minister chu a mawhphurhna hle zo lovah puhin, "India ram state dang tam takin Covid-19 an do hneh tawh laiin mipui thuawih berna ram, Mizoram chu vei lai tam ber pawl kan ni ta reng a. Mizoram economy-in nasa takin a tuar a, chhungkaw tam tak eizawnna in a tuar a, sumdawnna tam tak tih tawp a ngaih phah hial a ni. Health Minister hian heng zawng zawng hi a hlawhchhamnaah pawm se, Health Minister a nihna hi mi thar chak zawk kutah hlan tawh mai rawh se tiin kan ngen a. He kan ngenna hi Chief Minister pawhin min lo ngaihpawimawh sak turin kan ngen nghal a ni," a ti bawk.