Aizawl; Covid-19 chu hun eng emaw chen a ziaawm hnuin tun hnai atang khan hri kai thar an pung thar leh a. Hri kai an pun chhan hi mipui inthlahdah vang nia a hriat thu State Nodal Officer on Covid-19 Dr. Pachuau Lalmalsawma chuan ZALEN a hrilh.

Dr. Pachuau Lalmalsawma chuan, “Mipuiten SOP an zawm tha tawk lo a, puipunna leh chhiatni/thatniah te mask vuah loa kal kan tam a. Nunphung pangngai anga kan kal leh tak avangin hri hi a hluar thar leh a ni,” a ti.

Dr. Sawma chuan Covid-19 hri vei chu a rukin an tam a rinthu sawiin, “Tuna positive hmuhchhuahho hi loh theih loha in-test ngaite an ni hlawm a. In-test loa hri kai mai bakah hri kai si; mahse, in-report lo hi an awm nual niin kan hria a. Fimkhur thar leh a ngai hle a ni,” a ti bawk.

Chhinchhiah danin kuminah Covid-19 vangin mi 161 an thi tawh a. January thla kha Covid-19 vanga thi an tam ber thla niin mi 65 an thi a, February thlain dawtin mi 47 an thi a. March-ah mi 28, April-ah 11, May-ah pahnih, June-ah panga leh tun thla, July-ah mi pathum an thi tawh a ni.

Hri kai tam lamah erawh chuan February thla khan kai an tam ber a, mi 39,631 ten an kai a. February thla hian hri kai zat (positivity rate) rate test atanga chhutin 25.25% a tling a ni.

January thla khan mi 33,357-in hri an kai a, March thlaah 9,869, April-ah 2,931, May-ah 883, June-ah 770 leh July 8, Zirtawpni thleng khan hri kai hi 561 an tling tawh a ni.

July thla bika hri kai awm zat chu July 1-ah 58, ni 2-ah 41, ni 3-ah 15, ni 4-ah 48, ni 5-ah 138, ni 6-ah 91, ni 7-ah 62 leh ni 8-ah 108 te an ni a. July 5, 2022 kha kumin April 27-a positive 164 hmuhchhuah a nih hnua positive za chuang hmuhchhuah a nih lehna hmasa ber a ni.

Chhinchhiah danin Fenruary 1 kha kumin chhung bikah ni khata hri kai hmuhchhuah tam ber ni niin hemi nia hri kai hmuh zat chu 2,573 an tling a ni.

2022 Mizoram dinhmun
Thla                Kai          Dam
January          33357     19938
February        39631     47792
March            9869       15681
April               2931       3292
May                883         1424
June               770          590
July (upto 8)  561         336