Aizawl: Mizoram covid 19 hripui a luh hnuah tun kar liam ta (May 16-22) kha hriat theih chinah inkaichhawn tam ber kar niin kai thar 1525 an awm a, tualchhunga inkaidarh tam ber kar ni bawkin 1468 an awm bawk a, kaini hriat loh tam ber tum niin 479 an awm bawk a ni. Sample 20079 lak ni bawkin kai thar percentage chu 7.50% niin inkhuahkhirh April 20 puan atanga a san ber kar a la ni bawk a ni. Hripui leng thawh khatna chhunga 'thla khata' case hmuh hnem ber chu November 2020 niin covid 19 positive mi 1089 an awm a ni

Kar liam ta khan chawhrual (average) in nitin mi 215 in hripui hi kai ang an ni a, hemi kar hmasa lam (May 9-15) inkar khan nitin mi 160 zelin kai ang an ni a,  inkhuahkhirh puan kar (April 20 kar)  ah nitin 75 in an kai niin data lakkhawm atanga chhut chhuah a ni.

Tualchhung inkaidarh hi kai zawng zawng atanga chhutin May 16-22 inkarah san lam panin 96.21% lai a ni hman a, kaina hriat loh (community transmission) chu 33.03% a tling bawk a ni. Ram pawna lo lut zat erawh nasa takin a tlahniama, May 9-15 inkarah 15.85% la nih laiin kar liam ta May 15-22 ah 3.78% ah a tlahniam thung a ni.

Hetih lai hian damdawi in atanga chhuahtir (discharged)chu 1136 niin 75.81% a ni a, san lam a pan zel a ni.