ZALEN May 11, 2025: Mizoram police-ten kumin January atanga April 15 thleng khan ruihhlo chi hrang hrang Rs. 52,00,15,865 hu man an nei tawh a, chumi kaihhnawiha mihring an man tawh zat chu mi 115 a ni a. Hetihlai hian tleirawlho zingah ganja a hluar niin Excise & Narcotics department hotute chuan an sawi.

Mizoram police tar lan danin kumin thla thum leh a chanve chhunga ruihhlo an manah hian thubuai 84 ziah luh an nei a, heroin kaihhnawihah thubuai ziah luh a tam ber a. Ruihhlo hrang hrang man zingah Methamphetamine chu man tam ber niin, hemi hun chhung hian kg 239.968 man an nei a, chu chu Rs. 31,19,58,400 man hu niin, chumi kaihhnawiah chuan thubuai 14 an ziak lut a, mi 13 man an nei.

Kumin January atanga April 15 thleng khan heroin kg 16.068 man tawh bawkin, chu chu Rs. 4,82,04,000 hu a tling a, thubuai 64 ziah luh niin mihring man 91 an awm a. Ganja kg 8.825 man tawh bawkin Rs. 44,125 hu a ni a, thubuai pathum ziak lutin mihring man panga an awm.

Rs. 15,50,70,000 (kg 5.169) hu Crystal Meth man tawh bawkin, thubuai pakhat ziah luh a awm a, chumi kaihhnawihah mi pahnih man an awm a. Caffeine kg 3,000 man tawh bawkin, Rs. 45,00,000 man hu a tling a, thubuai pakhat ziak lutin mi man pahnih an awm a. Hemi hun chhung vek hian Opium kg 3.989 man bawkin, Rs. 2,39,340 ma hu a ni a, thubuai pakhat ziak lutin mi pahnih man an awm.

END hotute chuan tunlaiin Mizo tleirawlho zingah ganja a hluar niin an sawi a, man pawh an man hnem niin an sawi.

END tar lan danin, kumin January atanga April thleng khan Mizoramah Ganja kg 110.421 man a ni tawh a, nikum 2024 chhung khan kg 578.592 zet man a lo ni tawh bawk.

END hian kumin January - Arpil chhung khan heroin kg 22.761 man an nei a, nikum chhung khan kg 46.680 man an nei a. Hemi hun chhun vek hian Methamphetamine kg 44.111 man an nei bawk a, nikum chhunga an man zat chu kg 140.839 zet a ni.