Thla khat dawn pawn chhuak loa han inkharkhip (lockdown) ngat ngat mai chu amah Roluaha (L) tawngkam takin, a mi ngei a na duh hle mai. Mahse, kan him nan a tul miau si a.

Lockdown chu naktip maiah khian a lo tawp dawn ta a, eng tin nge ni zel ang le? Central YMA chuan kan ram dinhmun thirin lockdown hi pawh sei zel nise tiin a rel a, an thu rel hi Mizoram sawrkarah thlen an tum bawk a. Odisha sawrkar chuan April 30 thleng an state bikah lockdown an pawh sei tur thu an puang a, India ramah lockdown pawh sei puang hmasa ber an ni. An ni hnuah hian Punjab leh Rajasthan te’n an puang ve leh bawk a.

Lockdown pawh sei leh pawh sei loh thuah hian ngaihdan a inang lo hle mai a, thenkhat chuan kan ramah coronavirus hri vei pakhat chauh hmuh chhuah a la awm a, chu pawh foreign atanga rawn hawng a ni a, rinhlelh kai endik zingah tumah positive an la awm lo bawk a, inkharkhip bur (complete lockdown) hi a tul lem lo ve an ti a, a dik tho mai. Chutih rualin he hri leng mek hian khawvel ram pumah kian lam aiin zual lam a pan mek zel a, ni tin mi sang telin an thihpui zawih zawih bawk a. India ramah pawh complete lockdown kan kalpui chung pawhin ni tin hri kai thar a za tel hmuhchhuah tur an awm reng a, complete lockdown phei hmang lo ila engtiang takin darh nasa ang maw?

Mizoramah hri vei hmuhchhuah thar an awm loh avang ngawt hian kan inthlahdah thiang lo ang. Kan thenawm, Assam state-ah he hri kai hmuhchhuah thar hi mi 28 an awm mek a, kan thlang lawk Silchar Medical College-ah mi pakhat, kum 65 miin a lo thihpui ve mek bawk a. Hri hlauhawmin kan thenawm state a luhchilh a, kan kawngkhar a kik mek lai hian kan inthlahdah tur a ni lo ang. Chuvangin, lockdown hi vawi leh khata hlih thut chi a ni lo. Sawrkar hian a lo thlahdul ta hlek a nih pawhin fimkhur leh uluk lehzualin ramri venhim hna hi kalpui ni se, mipui punkhawmna lam chi hi chu la khap bur mai se a tha ber ang.

An sawi danin kumin kum tira China-in Covid 19 a buaipui hle lai khan a thenawm ram Singapore chuan ralkhel dar a vua a, nasa takin an inkharkhip a, kai an awm mang lo. Kai an awm tak mang lohah chuan, ‘Kan tha khat a lawm’ tiin an inthlahdul zeuh a, an inthlahdul deuh takah chuan mipui pawh an lo ralmuang ta deuh a, a ruk leh ruk lo deuhte pawhin punkhawm a lo awm lo thei ta lo a, tah zet chuan hri a darh leh ta vak mai. A bul atangin nasa lehzuala an inkharkhip that leh a tul ta.

Khawvel chawkbuaitu he hri hlauhawm tak hi tisa leh thisen a ni lo a, mita hmuh tham loh khawpa tê ni mah se khawvel ram ropui ber berte pawhin an buan hneh loh a ni a, keini India ram state-ah pawh a pachhe ber pawl, sum leh pai lakluhna bulbal nei lo, intodelh bawk si lo hi kan inthahdah a thiang lo a ni. Kan inthlahdah zawngin kan nasa lo viau thei tlat. Ram buai lai khan pa pakhatin a tia lawm, “Sikh palian pui pui paruk, mal beih pawha ka hneh loh tur thiau maiin min han sual rawn a, chutah kei akar ka han tang tha duh lo chu ka rethei a nia aw,” a tih ang deuhin, khawvel ram ropui ber, USA meuh pawhin tihngaihna a hriat loh lakah hian keini akar hi kan inthlahdah a thiang lo a ni. Fimkhur tura kan inzirtir a, kan infuih thar mawlh mawlh hi a tul a ni. Min luhkhung chuan do hneh a har tawh ang. Min luhkhung hmaa theihtawpa kan inven fimkhur hi kan tihmakmawh a ni.

Coronavirus vanga heti hrepa kan buai takah chuan ei leh bara intodelh tulzia hi mipui leh sawrkar hian hre thar leh ila, he lam kawnga harh thar nan hian hmang hlauh ila va tha dawn em! Dik chauh chuan kan ram leilung nise eng thai pawhin a ngeih em em vek a, ruah tui nise kan dawng tha em em a, ram nise luah sen loh khawpin a la awl dei duai a, heti chung hian kan ei leh barah kan intodelh tlat si lo. Ei leh bara intodelh tura thapui kan thawh a, mut mawh hnar mawha kan neih hi a hun ta hle mai. Ram hmangaihtu tan tun hi thanharh hun a ni e.

Shopping mall changkang tak te, khelmual tha tak te, stadium changkang tak te neiin motor changkang tak te nei mah i la ei leh bara kan intodelh si loh chuang heng thilte hian awmzia a nei thui lutuk lem lo chu a nih hi. District tina phullem phah kan ngaih pawimawh tluk zet hian kut hnathawkte thlai thar vawn thatna tur (cold storage) sakte hi ngai pawimawh ila, hlawk zawka thlai an thar theih dan turte hi ngaihtuahpui i la kan ram hian kan thatpui zawk ngei ang. Tunah zet chuan thutna tha pawh nei zo loa kawng sir motor khu kara an thai thar thutpui ve hram hram thin, Zirtawpni zan atanga tlaivarpui thin thingtlang kut hnathawkte tluka mamawh kan nei ta lo. Engtikah nge an thlai tharte an rawn phurh luh theih ang tiin ring kan fan kan fan mai a nih hi.

China thufing chuan, “Ni khat hlim i duh chuan ruai theh la, thla khat hlim i duh chuan nupui nei la, kum tluana hlim i duh chuan huan siam rawh,” a ti a. Hlimna puarpawleng, ruahtui pai lo chhum leivak ang chauh buaipui hi bansan ila, Idol, Icon, Miss leh zaithiam pawh kan ngah tawk ta. He lamah hi chuan kan intodelh ta khawp mai. Hnam zahawm kan nih a, mahni inzahna (self respect) kan lo neih a, kumtluana kan hlim theih nan ei bara intodelh hi ngai pawimawh i la, hnapui berah i neih ang u. Ka mi mal ngaihdan phei chuan mua/rua ai pawha ngaih pawimawh hmasak tur niin ka hria.