Covid-19: US-ah mi 7,00,000-in an thihpui ta

Admin - Oct 03, 2021

Khawvela hripui tuar na ber ram an ni

United States-a Covid-19 vanga thi chu mi 7,00,000 chuang an ni ta niin Johns Hopkins University chuan a chhinchhiah a. Khawvela hripui tuar na ber ram niin thi zawng zawng zinga 15% chuang chu he rama mite hi an ni.

Thi zat hi an ram khawpui ber, Washington, DC–a cheng zat zet an ni ta a, Zirtawpni khan hetiang zat hi thlengin ni tin mi 1,000 velin thihpui ziah ang an ni.

US-ah hian an ram mipui zahve aia tam hret, 55.7% chuan invenna bikimin an la tawh niin Centers for Disease Control & Prevention chuan a tar lang.

Thi tharlam mi 1,00,000 hi vaccine awm tawh hnua mite an ni a. Invenna damdawi hi thihna, damdawi in awm phah ngai leh na lutuk tur chhawk thei tura ngaih a ni a. American kum 12 chin chung lam chuan an la thei.

Hripui a len tirh lam khan an ramin a hmachhawn dan chuan sawisel a hlawh hman hle a, a hnu atangin invenna pek rûnpui kalpuiin nasa taka tan lain ni tin dose maktaduai li vel pe ziah ang an ni.

Invenna pek beihpui hi thlak nasa viau mah se mipui tam takin an la duh chuang lo va. Hetih lai hian hri lenga a chi (variant) thar, inkai awlsam em em mai, Delta variant an tih chuan rûnin thla thum leh a chanve lek chhungin mi 6,00,000 thi atangin 7,00,000 an kai hman a ni.

Thla thum leh a chanve liam ta chhung hian state malah Florida chu thihna thlen tamna ber niin June thla laihawl atang khan mi 17,000 chuang an thi hman.

Texas chuan dawtin mi 13,000 vel an thi a. State pahniha mihring cheng zat hi an ram mipui zawng zawng atanga 15% vel an ni a, hetih lai hian an rama thla thum chhung leh a chanve chhunga Covid-19 vanga thi zawng zawng zinga 30% chu heng state pahniha mite hi an ni.

Washington-ah chuan mi eng emaw zatin White House atanga hla lo te,  National Mall-a phula pungkhawmin an rama COVID-19 avanga thite hriatrengna leh sunna hun an hmang.

Johns Hopkins University-in a chhinchhiah dan chuan, December, 2019-a China atanga darh tan, coronavirus avang hian khawvel pumah mi maktaduai 4.8 dawn an thi tawh a ni.

Share now