Aizawl: Sawrkar kum kal mek, April 2020 atanga December 2020 thleng khan Taxation department chuan chhiah Rs. 4,34,18,79,509 a hmu tawh a, hemi hun chhung vek kum hmasa lam April-December 2019 chhunga chhiah hmuh a phak lohna chu Rs. 57,49,36,089 a tling.

Taxation department hotute hnen atanga ZALEN thudawn danin kum kal mek 2020-21 chhunga chhiah hmuh beisei zat chu cheng vbc. 600 niin, December, 2020 thleng khan vbc. 434.18 hmuh tawh a ni a, beisei zat hmuh tlin a nih loh chuan Covid-19 hripui lengin a nghawng vang a nih thu Taxation department hotute chuan an sawi.

Covid-19 hripui len hma 2019-2020, April - December chhunga Taxation department-in chhiah a hmuh zawng zawng chu Rs. 4,91,68,15,598 (Vbc. 491.68) a tling a, Covid hri len hnu, 2020-2021, April - December chhung a hmuh zat erawh Rs. 4,34,18,79,509 (Vbc. 434.18) niin, kum kal taa phak lohna Rs. 57,49,36,089 a tling.

Covid-19 hri len hma 2019-2020 ah thla khat a chhiah luh tam ber thla chu May 2019 niin Rs, 77,15,44,501 hmuh a ni a, chhiah hmuh tlem ber thla June 2019-ah Rs. 42,00,50,098 hmuh a ni. Covid hri len hnu 2020-2021 chhunga chhiah hmuh tam ber thla, October, 2020-ah Rs. 72,37,37,401 hmuh a nih laiin, a tlem ber thla April 2020-a chhiah hmuh chu Rs. 14,35,16,224 a ni.