Aizawl; Covid-19 hripui leng lak a himna turin jail tawt lutuk tur ven a ni dawn a, hemi vang hian jail tang chhuah thentir an ni dawn.

Mizoram State Legal Service Authority (MSLSA) a member secretary R. Vanlalena hnen atanga ZALEN thudawn danin, Supreme Court of India thupek angin, Suo Moto Petition (C) No. 1/2020 angin Mizoram sawrkar chuan High Power Committee to prevent the spread of COVID-19 in jails chu 26.3.2020 khan a din a, Chairman Justice Michael Zothankhuma, Gauhati High Court Judge kaihhruaiin vawi 5 an thukhawm tawh.

He committee ruahmanna leh hmalakna angin, Covid 19 hripui thawh hnihna leng mekah Mizoram a jail hrang hrangte himna turin mitang thenkhat chhuah tir an ni dawn a, hei hian thubuai tenau lam ni 1 atanga kum 7 thleng jail tang tur a hrem theih thubuai nei te bak ah, thiam loh chang convict tawh zinga an tan hun hmang zo tep tawh, sawrkarin ngaihdamna 'Remission' a pek theih te a huam ang a, tualthat, pawngsual leh damdawi kaihhnawih thubuai lian nei te erawh a huam lo thung ang.

MSLSA member secretary sawi danin, High Power Committee chuan district tin a magistrate te atangin jail dinhmun leh mitang dinhmun kimchang te bakah, an thubuai khawih theuh a Covid boruak lai a bail a chhuah lailawk theih tur, tlanbo lo tur leh pawi dang khawih lo tur ang chi te list an dawng tawh a, chungte chu May 20, 2021 khan meeting nei a thlir ho in, court te chu bail a chhuah theih ni an hriat, pawi lian nei lo te chu bail a chhuah turin thurawn a pe a ni.

April 3, 2020 khan High Power Committe thutlukna bawhzuiin, Mizoram chhung jail hrang hranga tang mi 338 chhuah tir an lo ni tawh a, hemi chungchangah hian MSLSA member secretary chuan harsatna tawh an neih zui loh thu a sawi.