Indian Council of Medical Research (ICMR) chief Dr Rajiv Bahl chuan Covid kai thi nena khaikhinin Nipah virus kai thihpui zat bi chu an tam fe zawk tih a sawi. 

Dr Bahl-a hian Zirtawpni khan Nipah virus kai zinga 40-70% zet an thi a, Covid erawh 2-3% vel chauh a nih thu a sawi.

Zirtawpni khan Kerala-a Kozhikode-ah Nipah virus kai hmuh chhuah leh a ni a, hemi hnenah hian he state-a kai hi mi paruk an ni tawh a. A hmaa kai zinga pahnih an thi tawh.

Kerala-a a kai hmuh chhuah an pun mek lai hian India chuan Australia hnenah a kaite enkawlna tur, monoclonal antibody dose 20 a chah belh leh.

Chhim lam state-a Nipah virus a darh thar leh mek lai hian ICMR chuan a kai zinga thi zat bi hi Covid aiin a sang zawk a, a darh zel lohna turin a invenna damdawi siam tumin hma lak nghal turin ruahmanna an siam nghal tih an sawi.

“Kum 2018 khan Australia atangin monoclonal antibody chah thlen a ni a. Tunah hian damlo 10 enkawlna daih chiah a awm rih,” tiin Dr Bahl chuan news agency PTI hnenah a sawi. 

Dr Bahl-a hian India ram pawna Nipah virus kai mi 14 chu monoclonal antibody treatment an dawn hnuah an dam chhuak tih a sawi.

“A him tawk em tih enchhinna thawh khatna chu ram pawnah tih a ni tawh a. A thawk tha tawk em tih erawh en a la ni lo thung a. Tunah rih chuan a bik taka hman theih chauh a la ni rih a ni,” a ti.

Nipah virus kai an pun mek lai hian Kerala-a Kozhikode-ah chuan Inrinni atang khan chawlhkar khat chhung zirna in zawng zawng khar a ni dawn. 

Kerala Health Minister Veena George chuan Zirtawpni thleng khan Nipah virus kai nena inhnimhnai an chhui chhuah chu mi 1,080 an ni tawh a. Heng zinga 327 chu damdawi ina thawk an ni.