World Health Organization (WHO) chuan United States-in Chinese laboratory atanga Covid-19 chu a put nia an sawi hnuah ram tinte chu an intan dan an hriat dan sawi turin a ti ngen.

US Federal Bureau of Investigation Director Christopher Wray chuan Fox News hnenah FBI chuan COVID-19 hi ‘Wuhan-a lab-a chetsual palhna thleng atanga put a ni thei’ tih a sawi.

Wuhan hi kum 2019-a hri a darh tanna kha niin a darh tanna sa zarhna atangin virus research laboratory hi a hla lo a ni.

“Eng ram pawhin hripui intanna hi hriat an nei anih chuan WHO leh khawvel huap science thiam hnena hrilh chu tih makmawh a ni,” tiin WHO Director-General Tedros Adhanom Ghebreyesus chuan Zirtawpni khan a sawi.

“Hripui hi a intan dan kan hria a nih chuan nakin zela lo thleng leh thei lakah inven, inbuatsaih leh lo hmachhawn dan kan hre dawn a ni,” tiin WHO chief chuan a sawi.

WHO chuan a darh tan dan chhuina leh hriat tumna hi a la bansan lo tih a sawi bawk.

“WHO chuan China hnenah hian an thil hriatte tlang taka mi hrilh turin kan nawr reng a, chu chu thil tul leh a chhan hriat theihna tur a ni a. Min hrilh theih nan hian inhrethiam tawn takin ziakin leh tawngkain Chinese hruaitute chu vawi tam ka dawr tawh a, tun hnai lawkah pawh ka dawr a ni,” a ti.

WHO chief chuan hripui hi ‘a darh tan dan ni thei ang zawng zawng’ chu ngaihthah lovin an en zui zel tih a sawi bawk.

Tedros chuan politics khelh nana hri intan dan hman chuan science hmanga chhui a tihar sawt zawk a, a chhui chhuah a harsat phah tih a sawi bawk.

Mi maktaduai telin an thihpui leh mi tam takin an la chenpui reng thil chu a chhan hriat chhuah ngei chu thil tul a nih thu Tedros-a chuan a sawi bawk.

February 21 thleng khan WHO-in a chhinchhiah dan chuan Covid hi mi maktaduai 757 chuangin an kai tawh a, mi maktaduai 6.85 vel thi an awm tawh a. Thi zat hi a tak takah chuan hei aia tam daih nia an ngaih thu a sawi bawk.

Chinese thuneitute chu FBI-in lab atanga Covid darh anga an sawina chu an lawm lo hle a, Beijing lakah boruak tha lo tak siam a tumnaah a puh.

Foreign ministry thupuangtu, Mao Ning chuan kar hmasa khan Beijing hian hri darh tan dan chhuina chu langtlang takin a dawngsawng tih a sawi a. US chu khawvel hmun hrang hranga an biological laboratory-te chu engtin nge a nih theih dan dapa en chiang turin a ti.

Mao-i chuan, “US hian khawvelin a zawhna bakah Fort Detrick leh a sipaite leh khawvel hmun hrang hranga biological lab a neihte chungchang sawi fiah rawh se,” a ti a. “Politicis khelh nana hmang lo turin kan ti a, US hian China hi a dah hniam thei chuang lo va, amah leh amah a intichhe mai mai a ni,” a ti.

WHO hnuaia COVID-19 technical lead Maria Van Kerkhove pawhin Geneva-a US palai hnenah FBI chief-in hri darh tan dan a sawi chu sawi fiah turin an ti tih a sawi a. Lab atang ni thei anga an sawi tanchhan chu an la dawng lo tih a sawi bawk.