DOWNLOAD OUR APP

Read latest news on your phone
app-store
Covid health emergency tihtawp a ni ta
May 07, 2023

World Health Organization (WHO) chuan Covid-19 avanga khawvel puma ‘health emergency’ a puan chu a titawp ta.

Thuchhuah a siamah hripui hian reh lam a pan ta tih a lang a, a vanglai atanga kum thum hnuah hri avanga ralkhelh chu a tul tawh lo a ti a ni.

Thuneitute chuan hri leng avanga thi hi a vang lai, January, 2021-a chawlhkar khata mi 1,00,000 chuang thi awm thin chu April 24-ah kha chuan mi 3,500 awrh chauh a ni tawh tih an sawi.

WHO chief chuan hripui avang hian mi maktaduai sarih vel an thi tih a sawi.

Hetih rual hian Dr Tedros Adhanom Ghebreyesus chuan a tak taka thihpui zat chu mi maktaduai 20 dawn a ni thei tih a sawi a, chhinchhiah chin aia a let thum dawna tam tihna a ni a. Hri chu a la hlauhawm reng bawk tih a sawi.

“Nimin (Zirtawpni) khan Emergency Committee chu a vawi 15 nan thukhawmin khawvel puma public health emergency puan chu titawp turin thu min rawn a, an thurawn hi ka pawmsak a. Covid-19 avanga ‘global health emergency’ puan chu a tawp ta tih ka puang a ni,” tiin Dr Tedros chuan a sawi.

WHO hotupa chuan thutlukna hi ngun taka ngaihtuah hnu leh data hrang hrang zira dinhmun thlir chunga siam a nih thu a sawi bawk.

Hri leng hlauhawm tak dinhmuna dinna phelh a nih tak avangin hlauhawm chu a kiang ta tihna a nih loh thu a sawi a, dinhmun zel azirin emergency puan leh theih reng a nih thu a sawi bawk.

“Ram tinah he thu puan avanga invenna hlih te, inthlahdah te, Covid-19 chu veiawm a ni tawh lo tih te ngaihdan a nih chuan thil tha lo tak a ni ang,” a ti.

WHO hian Covid-19 avang hian public health emergency of international concern (PHEIC) chu January, 2020 khan a puang.

Hei hi ram hrang hrangten hri laka mipuite an venhim theih nana tih a ni.

Tunah erawh chuan ram tinin anmahni dinhmun leh tha an tih angin Covid hi an hmachhawn a ngai tawh dawn a ni.

Khawvel Damna Vaccine

Hripui leng laka khawvel a him takna chhan bulpui ber nia ngaih chu a invenna (vaccine) awm ta a ni a. WHO chuan mi tluklehdingawn 13 chuangin invenna hi an la tawh a, hei hian mi tam tak chu hri an kai loh bakah an kai a nih pawhin na taka awm theihna leh thihna lakah a veng tih a sawi.

Vaccine hi himna pawimawh ber ni mah se ram rethei, mamawh tak tak hnenah a la thleng lo nasa hle a.

Covid hi khawvel pumah mi maktaduai 765 velin an kai anga chhinchhiah a ni a. Tunah chuan US leh UK bakah ram dang tam takin ‘hri nena chen dun’ tih an tlangaupui tawh a, kai leh kai lo endik pawh a tlahniam tawh hle.

WHO hnuaia health emergencies programme hotu, Dr Mike Ryan chuan emergency hi tawp tawh mah se hlauhawm erawh a la awm reng tih a sawi a. “He hri hi a la kal zel dawn, chu chu hripui leng zia a ni a. Kum 1918-a hripui leng pawh kha a tawp meuh chuan kum 10 chuang a liam hman tawh a ni,” a ti.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh