India ramah Covid-19 kai an pung thar leh mek a, darkar 24 liam ta chhung pawh khan mi 6,155-in an kai tih hmuh chhuah leh niin a hma nia mi 6,050 hmuh aiin mi 100-in an tam zawk.

Hri kai hmuh thar lehte nen hian India-a coronavirus kai hi mi 4,47,51,259 an ni ta a. Health ministry chhinchhiah dan chuan a kai enkawl lai hi mi 31,194 an la awm mek.

Health ministry chuan darkar 24 liam ta chhung hian mi 11-in an thihpui tiin a chhinchhiah thar a, mi 5,30,954-in an thihpui tawh a ni.

Union health ministry hian state tinte chu hri kai tam zualna lai bik hai chhuah te, endik tihtam te kalpui turin a chah.

Health Minister Mansukh Mandaviya chuan Pathianni khan state hrang hranga healh minister leh hotu dangte kawmin hri kaiten eng ang chi ber nge an kai tih hre tur leh damdawi inah mock drill nei turin a chah bawk.