China-a apartment block pakhata kangmei nasa tak chhuaka mi 10 an thih hnuah Covid avanga inkhuahkhirhna duh lohna chu nasa taka lantir thar a ni a, social media-ah video pawh nasa taka thehdarh a ni.

Mipui lungawi lote hi thuneitute nen inhmachhawnin anmahni dalna an an bawh chhia a, ‘Covid lockdown tihtawp ni rawh se’ tiin an au rual bawk.

Beijing hian zero-Covid policy a la kalpui reng a, hetih lai hian a kai hmuh thar tam ber ni leh mipui thinrimna a sang zel bawk.

Urumqi khawpui thuneitute chuan Ningania kangmei chhuakah hian mite insaseng tur chu inkhuahkhirhna hian a dal niin an sawi.

Khawthlang lama Xinjiang region khawpuiah hian August thla tir atangin inkhuahkhirhna kalpui tan a ni tawh.

Kangmei chhuahna hnaiha cheng pakhat chuan tlanchhe turin an ven tlat thu a sawi.

Chinese sorkar chanchinbu erawh chuan chutiang a nih loh thu a tar lang a. Hetih lai hian Urumqi thuneitute chuan Zirtawpni zan khan ngaihdam dil aiin mipui vau zawngin, tute pawh thupek zawm lo chu hrem an nih tur thu an chhuah leh a, hei hian mipui a tithinrim zual.

Zirtawpni zanah khan mi chengte chu hmai tuama pungkhawmin khawlaiah inkhuahkhirh duh lohna hi an lantir.

An au rual a, thuneitute nen an intawng nasa hle tih Reuters news agency chuan a tar lang.

An zinga pakhat chu megaphone hmanga a au lauh lauh lai a hmuh thei a, clip dangah mipuiin police-ten an danna an su chhe lai a lang bawk.

China-ah hian internet hi nasa taka thunun a nih avangin Urumqi-a lungawi lohna lantirtute chet dan lannate chu Inrinni tukah khan paih nghal vek a ni.