Aizawl : Human Resources Development Board vice chairman leh Lengteng bialtu MLA ni bawk Dr. L.Thangmawia chuan, "India ram Board tamtak zingah Mizoram Board of School Education (MBSE) hi Covid laia Board Exam kalpui thei awmchhun kan ni," a ti.    

Kawlkulh MZP Sub-Headquarters-in HSLC leh HSSLC-a ti tha te chawimawina hun an buatsaih, Kawlkulh Town Hall-a neih a hmanpuinaah he thu hi sawiin Dr. L.Thangmawia chuan, "Covid hun thim Mizoramin kan paltlang lai pawhin zirna hi a chawl ve lo a, a theih ang angin online leh offline mode te a zirna kalpui a ni a, India ram Board tam tak zingah MBSE chu Covid laia Board Exam kalpui thei awmchhun an ni a, Board dangin an rawn zirchiang hial a ni," a ti.

Zirlaite chu tum mumal nei tura fuihin Dr. Thangmawia chuan, "Tum mumal nei lo zirlaite chu goal awm lova football khel ang an ni a, hlawhtlin a harsa fo thin. Mahni chak zawng leh tui zawng damchhunga kan thawh theihnan tum mumal kan neih a ngai a, kan tum tihlawhtling turin Pathian rawn chunga nasa taka kan thawh a ngai a, zirlai ten in hun kal zel turah khawtlang tan leh Mizo hnam tana chhenfakawm ni thei tura taima taka in zir chhunzawm zel ka duh takzet a ni," a ti.