Aizawl: Central YMA chuan Covid-19 hrileng laka Mizo mipuite kan him tlan zel theih nan sawrkar thupek leh veng/khaw tina Task Force-te thu leh hla ngaichang a, zawm theuh turin mitin an ngen.

Thuchhuah an siamah Central YMA chuan hripui (Covid-19)-in Mizoram min chenchilh mek karah, mipuite himna tura sawrkar department hrang hrang, thawktu hrang hrangte leh Local/Village Level Task Force-te hmalaknaah lawmthu an sawi a. Hripui lengin min kiansan deuh nia a lan laiin, October 2020 thla laihawl atangin hri lengin Mizoram hmun hrang hrang min nuai leh nia sawiin hrileng avanga harsatna tawkte chhawmdawla tanpui zel thei turin mi tinte inbuatsaih tura an ngen bakah hripui leng laka kan him zel theih nan bâng lova Pathian hnena tawngtai tur leh fimkhur zel turin mipuite an ngen bawk.