February ni 19, 2021 khan ZMC RT-PCR laboratory-a sample test zingah positive hmuh chhuah a awm lova, District hrang hrang TrueNAT laboratory-a sample test zingah positive 1 awmin, RAgT hmanga sample test zingah positive 1 hmuhchhuah a ni.

TrueNAT Positive hi Champhai Vengsang ami, hmeichhia kum 29 mi a ni a. Zin chhuak tur a nih vanga sample test, symptom nei lo niin, hri a kaina chhui mek a ni. RAgT Positive hi Lunglei district Muallianpui ami, mipa kum 15 mi, hostel luh dawn avanga sample test a ni a. Symptom a nei lova, hri a kaina chhui mek a ni.

Tun dinhmunah Mizoramah Covid-19 case 4,407 a awm tawh a, heng zinga 3,222 hi mipa niin 1,185 chu hmeichhia an ni a, enkawlna hmun atangin 4,373 damin an chhuak a, mi 10-in an thih phah tawh a, tuna vei enkawl mek 24 an ni.

District hrang hrang dinhmun chu Aizawlah vei mek 9, dam tawh 2,869 niin thi 9, Lungleiah vei mek 3, dam tawh 414, Siahaah vei mek awm lo a, dam tawh 36, Champhaiah vei mek 3, dam tawh 94, Kolasib ah vei mek awm lo, dam tawh 295, Serchhipah vei mek awm lo, dam tawh 179 niin thi 1, Lawngtlaiah vei mek 8, dam tawh 332, Mamitah vei mek awm lo, dam tawh 82, Khawzawlah vei mek awm lo, dam tawh 23, Hnahthialah vei mek awm lo, dam tawh 20, Saitualah vei mek 1, dam tawh 29 an ni.