Aizawl: Mizoram Victims of Crime Compensation 2011 hnuaiah mi 196 te chhawmdawl nan tanpui an ni tawh.

Mizoram State Legal Service Authority atanga Zalen thudawn danin victim compensation pek tawh te hi pawngsual tuar mi 30, Arms Act 9, tual thah 29, POCSO 123, na taka inhliam 1, unnatural offence 1, hmanraw hmanga na taka mi hliam 2 leh mi rukbo 1 te an ni tih Zalen an hrilh. District hrang hrang atanga compensation pek te hi Aizawl district ah 65, Lunglei 24, Champhai 32, Siaha 12, Lawngtlai 5, Serchhip 16, Kolasib 9 leh Mamit district 33 te an ni.

Mizoram State Legal Service Authority-a Member Secretary Vanlalenmawia chuan, "Tunhmaa victim compensation dawng thei tur chu BPL family an ni tur a ni tih chu siamthat a ni tawh a, vanduaina tawk tan chuan a dil theih vek a. Sum dawn tur zat tam lam pawh bi thliah a awm lo a ni," a ti. Vanlalenmawia chuan dan tlangpuiah thih na thlengah nuai 1-3 inkar a niin an thih dan a zirin nuai 10 thleng, pawngsual ah nuai 3 aia tlem lo leh a dangah te pawh pek theih zat tur a inziak tih sawiin, "Tuna kan dan hman mekah hian a tlem lam chauh a inziak a, a tam lama pek theih zat a inziah loh avangin dan hi kan duang thar mek a. High Court in min pawmpui chuan kan hmang thei thuai ang," a ti bawk.

Victim compensation dil tur hian Police ah FIR thehluh emaw Magistrate ah complaint thehluh ngei a ngai a, enquiry report nen mahni awmna District Legal Service Authority ah thehluh thin tur anih thu MSLSA thawk tute chuan an sawi bawk. Chhawmdawlna sum te hi a enfiahtu ten dil/hmu tlak nia an hriat te chu Finance department ah an dilsak a, Finance lam hian harsatna awm lovin a pechhuak zek thin a ni.