Aizawl: Child Welfare Committee in nikum chhunga case an ngaihtuah ah puitlingin naupang chunga hursualna an tih 'sexual abuse' a tam ber a. JJB case ah rukruk (theft) a tam ber thung.

ZALEN in Mizoram State Child Protection Society thawktu te hnen atanga thu a dawn danin Child Welfare Committee hian nikum chhung khan case dawn thar 501 neiin kum hmasa lama pending 61 nen case 562 an ngaihtuah a, heng zinga case 512 an chingfel a, case 50 chu kumthar lama ngaihtuah chhunzawm turin an dah. CWC case ngaihtuah zing-ah hian sexual abuse (puitlingin hursualna rawng kaia naupang an khawihna) case chu tam berin 97 a awm. 

Case dang langsar zual te chu ngaihsak loh (neglect) 58, custodial 35, ruihtheih thil chi hrang hrang ti (substance abuse) 19, naupang kutthlak (physical abuse) 30, naupang harsa lutuk (extreme poverty) 39, rilru lama harsatna nei 33, nu leh pa kara awmloh vanga dinhmun chhia/naupang venhim ngai bik (vulnerable children) 43 leh fa enkawl tlak lo nu leh pa (incapacitated parents) 58 te an ni. CWC hian naupang chungchang an ngaihtuah zingah hian 68 chu an nu leh pa hnenah an dah leh a, 145 chu home ah dahin 112 chu councelling neihpui an ni a, naupang 137 te case erawh an chingfel hrih lo a, kumthar lama ngaihtuah chhunzawm atan an dah a ni.

Tleirawl/rawlthar chungchang ngaihtuahtu Juvenile Justice Board (JJB) pawhin nikum chhung khan case 172 dawn thar neiin kum hmasa lama pending 91 nen case case 263 an ngaihtuah a, heng zinga case 212 chu chingfelin a dang case 51 chu kumthar lama ngaihtuah chhunzawm turin an dah. 

JJB case dawnthar zingah hian rukruk (theft) a tam ber a, 67 awmin mipat hmeichhiat kaihhnawih (POCSO Act) 39, ruihhlo (ND&PS Act) 10, zu kaihhnawih case (MLPC Act) 3 awmin case dang 30 a awm bawk. JJB hian tleirawl/rawlthar zinga 76 chu an zilh (thurawn pek) hnuah an haw tir leh a, 87 chu tha taka nung turin an chah a, 9 chu special home ah dah an niin 25 te erawh thil tihsual an nei lo nia hriat a ni thung.

CWC leh JJB hian nikum chhung khan nuaoang 182 chu children home ah an dah a, observation home ah 136, special home ah 10 leh naupang lak theihna (adoption agency) ah 12, an vaiin home hrang hrangah naupang 340 an dah a ni.