Zirtawpni zan tlai tawh taka Cyclone Mandous-in Tamil Nadu a nuainaah mi pali an thi a, power supply tam tak a khaihlak bawk.

Mandaus hian darkar khata km 75-a chak thli kengin khawmual a kai a, Inrinni chawhnuah erawh a chakna tam tak hloh tawhin deep depression chauh a ni tawh.

State khawpui, Chennai-ah chuan ruah mm 115 zet a tla a. Thingkung 400 vel zet thlipui thawk hian a chhem thlu niin Chief Minister M K Stalin chuan a sawi.

Kasimedu-a thil thlengte thlira sorkar hotute nen an thutkhawm hnuah Stalin chuan sorkarin invenna leh inbuatsaih lawkna a kalpui that avangin chhiatna lian an pumpelh tih thuthar lakhawmtute hnenah a sawi a. “Inbuatsaihna tha nen chuan he sorkar hian chhiatna lian tak thleng thei pawh a lo dawl zo tih fiahin a awm,” a ti.

Cyclone hi Zirtawpni zan dar 11.30 vel atangin Mamallapuram (Mahabalipuram) bulah khawmualah a lut tan a, zing dar 1.30 vel thleng a thawk a, Chengalpattu leh a thenawm, Chennai-ah chuan thingkung a chhem thlu nasa hle.

Kovalam leh a ria awm, Mamallapuram-ah chuan lawnglengte a chhiat bakah tuipui kama dawrte a chhe bawk a. “Rangva in chung a thlawh nasa a, fisheries leh revenue thuneituten lawngleng chhiate hi an endik vel mek,” tiin Shobana Thangam, Kovalam Village Panchayat President chuan a sawi.

Mandaus avang hian Inrinni tukah khan Andhra Pradesh-a tuipui kam leh Rayalaseema district-ah chuan ruah a sur nasa hle a. State sorkarin report a siamah chuan Tirupati district-a Naidupeta chu ruah dawng hnem ber niin darkar 24 chhungin mm 281.5 a sur hman tih an tar lang.

Mandaus kaihhnawih thil thleng

Cyclone Mandaus hi a thawk dawn tih puan a nih tirh chuan a na ber dawttu, ‘Severe Cyclonic Storm’ tura sawi lawk a ni a, thlipui pawh darkar khata km 89-117 zeta chak keng tura ngaih a ni a. A hnuah ‘Cyclonic Storm’ chauh a ni dawn tih puan zui leh niin thlipui pawh darkar khata km 62-88 keng tura tih a ni.

Tamil Nadu state sorkar chuan district 10-ah National Disaster Response Force (NDRF) team a inrintir bakah relief centre 5,000 zet a siam a. Chengalpattu district-ah ringawt pawh heng centre zinga 28-ah hian chhungkaw 1,058 zet himna zawngin an tlan khawm a ni.

A hming hi United Arab Emirates (UAE)-in World Meteorological Organisation (WMO) member an nih anga an phuah a ni a. Arabic tawng niin ‘treasure box’ (ro bawm) tihna a ni a, ‘Man-Dous’ tia lam tur a ni.

Cyclone hming hi regional meteorological centre leh tropical cyclone warning centre ten a hming an phuah thin a. Regional centre hi paruk awmin Indian Meteorological Department (IMD) pawh hi pakhat a ni a, tropical warning centre panga a awm bawk.