Aizawl: Central Young Lai Association chuan District Hospital Lawngtlai-a thawktu indaihlohna phuhru tur leh Bungtlang South PHC-a Medical Officer dah tura nawrnan May ni 25,2022 atanga pisa kai tur an dan chu nimin khan an titawp.

YLA thuchhuah tarlan danin district hospital Lawngtlai a thawktu dahbelh leh Bungtlang South PHC-a Medical Officer dah phut vanga May 25, 2022 (Nilaini) atanga Central YLA huaihawta sawrkar pisa kai tur dan (picketing) neih chu Lawngtlai District mipuite leh Mizoram Sawrkar a thuneitute, Lawngtlai East & West MLA, CEM (LADC) leh D.C, Lawngtlai te zarah kan duhthusam ang thlapa hlawhtling ni chiah rih lo mahse kan mamawh em em Doctor Specialist Gynecologist, Pediatrician leh ENT Specialist te District Hospital Lawngtlai a thawktur an rawn transfer tak avangin leh Bungtlang South PHC-a Medical Officer an dah tâk avangin Central YLA CEC leh Town Branch YLA aiawh Joint Meeting chuan May 28, 2022 (Inrinni) atangin a call off a ni tih an sawi a. Picketing neih chhunga Lawngtlai District mipuite thawhpuina zawng zawng avangin Central YLA chuan lawmthu an sawi.