ZALEN January 10, 2024 : Central YMA Executive Committee Thawhtan zana thukhawm chuan tunhnaia India sawrkarin India leh Myanmar inrina laia mi chengte zalen taka an inkalpawh tawn theihna 'Free Movement Regime (FMR)" tihbo a tum chungchang an ngaihtuah, thiah a nih lohna turin theihtawp chhuah an tum.

Mizo hnam takan tangkai a nih laia, India sawrkarin thiah a tum chu tha an ti lova ; FMR thiah a ramri hungna siam a nih chuan Mizo hnam inpumkhatna nasa takin a chhe dawn a, chuvangin thiah a nih lohna turin thehtawpa hmalak nise an ti. Thiah a nih lohna tura Mizoram sawrkar hmalakna pawh an thlawp tih an tarlang.

CYMA chuan, Free Movement Regime hi September 26, 1968 a siam tawh, India leh Myanmar inrinna ramri hrul lehlam ve ve a phalna (Visa) ngai lova Km 16 a thui inkalpawh tawn theihna tura duan a ni a, he dan siam a nih chhan hi ramri lehlam ve ve-ah hnam khat, chi khat leh chhungkhat laina te an awm thin avangin awlsam taka an inkal pawh theih nan te, sumdawn tawnna leh ei leh bar zawn a awlsam zawkna avang te a siam a ni. Mizote tan an unau Myanmar lama awmte nen inpawh taka kan tlawh tawn theihna remchang leh kan impumkhatna atana a tangkai em em a ni," an ti.