July 11: CYMA chuan Manipur raltlante an awm lailawkna transit camp a siam chu enkawl hautak a ti tawh hle a, sawrkar chu a che muang tiin sawrkar-in hmun a neihte hman belh tura peih theih ni tawh se an tih thu ZALEN an hrilh.

Committee on Internally Displaced Person a awm a, sawrkar anga hmalakna a muang a tih thu CYMA President, R.Lalngheta chuan sawiin, "Kan unaute hi dahkhawmna kan neih loh chuan kan buai ang. CYMA in a siam hi chu transit camp a nih angin reilote an awmna hmun tur a ni a, heta tang hian hmun danga an awmna hmun tur an pan leh thin a." a ti a.

"Kan dinhmun hi a mangan thlak hle a, sawrkar a muan chuan a mangan thlak tawlh tawlh ang. Tuna kan dinhmunah chuan kan branch 12-te an hahin an hmun neihte thil dang atan hman an duh ve tawh a, kalna neilo an kawl lo thei si loa. An sum hnar te a lo ni bawk nen, an zahawm kan ti tawh hle a. CYMA Hall ah pawh hian an awm deuh reng a, thil dang tih nan kan hman a ngai ve tawh a ni." tiin CYMA President chuan a sawi bawk. 

"BSUP Durtlang leh Edenthar a ruak mek a, Sawrkar building thenkhat hman theih mai a awm tihte pawh a hmunah kalin en a ni tawh a. A hmun hi sawrkar hian tum se a tul angin sum pawh kan ngaihtuah ve anga, tha ang zawng pawhin kan pui thei ve ang. Tan ho kan inhuama heti ringawt chuan raltlan mitthi an awma sawrkar pawh kan pur ngam lo,"  tiin ZALEN a hrilh a.

CYMA hruaitute sawi danin sawrkar lam chuan Berawtlang leh Tourist Convention Centre-ah raltlan tlem an dah a. CYMA sawi danin an transit camp ah hian mi 512 an ziak lut tawh a, branch 12 ah sem darh an ni a, CYMA Hall lamah awm an awm reng bawk a ni.