ZALEN August 28, 2023 : Aizawla cham mek Govt of India, Ministry of Minority Affairs Minister John Barla chuan vawiin tlai khan Central YMA office-ah lengin Central YMA hruaitute a kawm, hnam hnuaihnung leh tlem zawk te tana theihtawp chhuah zel turin a ngen.

Union Minister hi Mizoram BJP President Vanlalhmuaka leh a thawhpui ten an tawiawm a, R Lalngheta, President hovin Central YMA hruaituten an lo dawngsawng a ni.

Union Minister for Minority Affairs, John Barla chuan Central YMA hruaitute hnenah YMA-in Mizoram leh hnam tana a hnathawh thin chu ropui tiin a ngaihhlut thu a hrilh a. Hnam hnuaihnung zawk leh tlem zawkte tana theih tawp chhuah zel turin a ngen.

Central Sawrkar in hnam tê leh tlem zawkte tana ruahmanna a siam te sawi vek sen a nih loh thu leh heng hamthatna te hi Mizoram tana luan luh tir a duhthu a sawi a, Scheme hrang hrang guidelines ziah lanna chu Central YMA hruaitute hnenah hian a hlan nghal bawk a ni.

Central YMA hruaitute hnenah hian Aizawl khawpui atanga Thingtlang leh hmun kilkhawr zawka ruang in phurh zung zung theih nan, Morque Van tha tak pek a tum thu Union Minister hian a sawi a, Central YMA hruaitute chuan lawmthu an sawi a ni.