Aizawl: Mizoramah damdawi hman sual vanga thi an tlem chho telh telh a, nikum khan drugs vanga thi mi 43 awmin hei hi kum 2017 atanga chhutin kum khata damdawi hman sual vanga thi an tlem ber kum a ni.

Excise & Narcotics Department (END) -in an chhinchhiah danin nikum chhung khan damdawi hman sual vanga thi hi Mizoramah mi 43 an awm a, heng zinga 39 hi mipa niin hmeichhia pali an awm bawk.

Damdawi ti thinte thihpui tam ber hi heroin niin mi 24 thihpui an awm a, a dangte pawh hi heroin leh thil dang tihpawlh te an ni.

END chhinchhiah danin kum 2017 atang khan damdawi hman sual vanga thi hi an ziaawm telh telh a, kum 2017 khan damdawi hman sual vanga thi 65, 2018-ah 56, 2019-ah 55, 2020-ah 67, 2021-ah 47 leh nikum 2022-ah 43 te an awm a ni.

END chhinchhiah danin kumin January 13 thleng khan Mizoramah damdawi hman sual vang hian mi pathum an boral tawh a, heng mite hi mipa vek niin an vai hian heroin leh thil dang remchang tikawp te an ni.

Kum 1984 atang khan Mizoramah damdawi hman sual vanga thi mi 1,736 an awm tawh a, heng zinga 1,531 chu mipa niin hmeichhia 205 an awm bawk.

Damdawi ti thinte thihpui tam ber chu proxyvon/parvon spas a ni a, mi 1,161 thi in heroin vanga thi 233 leh a remchang apiang tih thin vanga thi 342 an awm bawk.