Aizawl June 10, 2023 : Mizo Students Union General Headquarters, Aizawl in Mizoram damdawiin hmun hrang hrang leh raltlante tanpuina tur USA atanga Project Mizoram hminga an chah, Project Mizoram container bungrua Nuai 400 chuang man chu Netaji Subash Chandra Bose lawng chawlhna hmun atangin Mizoram lama rawn phurh chhoh turin an ti fel.

Project Mizoram buaipuina chungchangah hian Myanmar Refugee Relief Committee, Bangladesh Refugee Relief Committee, R2P Myanmar Way, Arizona Falam Baptist Church leh Chin Health Organisation te an tel a. United State of America atanga rawn thawnna hi Project C.U.R.E (World Largest Medicals Equipment Suppliers) lamin mawh an la a. Kolkata atanga Mizorama phurh luh leh sem chhuahna lamah Mizoram sawrkar tanpuina in MSU mawh a la thung a ni. 

A thawhkhatna hi 2022 July thla khan sem darh tawh niin a thawhhnihna ah hian wheat atanga siam buhfai Mana Pack khung tel a ni bawk. Project Mizoram Second Container rual hian Mizoram a damdawiin thlan bik parukah damlo enkawlna tur khawl leh bungrua tam zawk pek theihna tur package a tel a ni. Project Mizoram container bungrua hlut zawng hi US Dollar Nuai Li leh Singhnih man hu a ni a, Mana Pack nen hian India pawisa in cheng nuai zali leh singkua man hu vel a ni. Heng bungrua hi Mizoram chhung leh ram pawn lama a mamawh tute hnenah a thlawn a sem darh tur a ni.

June 7,2023 khan MSU President Samuel Zoramthanpuia, Lalramhluna Fanai General Secretary, Zodinsanga Treasurer, Roluahpuia i/c Secretary Health leh Vanlalchhana, President  Myanmar Refugee Relief Committee te chu bungraw lachhuak tur hian Kolkata an thleng thla a ni.

MSU hruaitute Kolkata a an cham chhunga an hman tur chu Aizawl Munical Corporator B.Lalawmpuii chuan a pe. MSU chuan he project hlawhtlinna atana theihtawp chhuahsak tu Mizoram sawrkar chungah lawmthu an sawi.