Aizawl; Mizoram Pradesh Congress Committee chuan, “MNF sawrkarin sawrkar hnathawkte hlawh pek a harsat lai leh damlo bill cheng vaibelchhe tam tak mipuia an bat laiin an duhsak zawng contractor-te tan sum harsatna a awm ngai lo a ni,” an ti.

Nimin khan Aizawl Press Club-ah chanchinbumite kawmin MPCC thupuangtu, Dr. Lallianchhunga chuan he document nei tur hian nasa taka beih a nih thu a sawi a, July 15, 2022-a treasury lama RTI-a zawhna an zawh chu chhan that loh a nih avangin Mizoram State Information Commission-ah zualko a ni a ti a, August 19 khan thutlukna siamin Chief Information Commission chuan an zawhnate chu chhang turin treasury lamte order a pek hnuah tuna document-te hi an nei thei ta tih a sawi.

MPCC thu-puangtu chuan, “MNF sawrkar hnuaiah sum leh pai harsatna chuan a vawrtawp a thleng chho mek a. Mizoram leiba nasa takin a pung a, sawrkar hnathawkten thla tirah hlawh an la thei tawh lo a. Health care bill ba ringawt pawh Rs. vbc. 77 zet a tling tawh a, contractor tam berten hun rei tak an hnathawhna bill an la thei tawh lo bawk a ni,” a ti a. Mizoram sum dinhmun chu a chhe tak zet tih sawiin, “Mizoram sum leh pai dinhmun chu ‘siam that mai theih tawh loh khawpa dinhmun chhiaah’ a ding ta a ni. MNF sawrkar pawhin tihngaihna an hre tawh lo a, kil hrang hrangah puk tur an dap ngat ngat reng a, sum awm hmasa apiang leiba rulh nan leh hlawhah a kal zel a ngai a. Hetiang taka dinhmun chhiaah hian Mizoram sawrkar hi a la awm ngai lo a ni,” a ti.

Dr. Lallianchhunga chuan hetiang taka Mizoram sawrkarin sum leh pai lama harsatna a tawh mek lai leh contractor tam zawkin bill an lak theih loh laiin Chief Minister duhsak zawng contractor-te chuan bill lak kawngah harsatna an tawk ve ngai lo niin a sawi a. RTI hmanga Treasury Office 9 te chhanna atanga a lan danin Kamlova Chhangte bill pathum – Rs. 1,54,15,277 te, Rs.  3,47,24,723 te, Rs. 4,00,00,000, a vaiin, cheng vaibelchhe 9 chu an thehluh ni la lain Siaha Treasury atangin release nghal a ni a. Kamlova Chhangte bill hrang hrang cheng vaibelchhe 9.92 chu chawlhkar khat chhung lekin Siaha Treasury atanga release vek a ni bawk a. Chief Minister laichin (a tupa?) Zoramchhana bill 2 cheng vaibelchhe 8.84 chu bill a thehluh ni la lain Aizawl South Treasury atanga release a ni a, a bill dang 2 cheng vaibelchhe 3.65 pawh ni 3 chhunga release vek a nih bakah Robert Romawia Royte Company NECS bill te, MLN Projects bill te, F. Lalliansanga bill te, Tantia Construction Ltd bill te, a vaiin cheng vaibelchhe 8 chuang pawh bill thehluh ni la lain release vek an ni bawk niin a sawi.

MPCC thupuangtu chuan 26th Aug.2022 thleng khan Health care dam lo bill tang cheng vbc 77,97,69,971 a awm tih sawiin hei hi Health Care a inziak lut chhungkaw 39,505 atangin chhungkaw 28,448 (72.01%) damlo bill sawrkarin a ba mek tihna a ni tiin, "Heti khawpa chhungkaw 28,448 te  mamawh ngawih ngawih dam lo bill hrensak an nih laiin an duhsak zual Contractor/supplier te tan Health Dept hnuaiah sum harsatna a awm ngai lo a. Healthcare Scheme hnuaia in ziak lut mi harsa zawk ten bill lak theih loh vanga inenkawl zui thei ta lo chhungkaw tam tak an awm laia an duhsak zawng Contractor te bill pek kawnga harsatna a tawk miah lo hi hriatthiam theihah Congress Party chuan kan ngai lo a, mipui hmusitna dik takah kan ngai a ni," a ti bawk.