Aizawl December 22, 2022; Mizoram Pradesh Congress Committee (MPCC) chuan MNF sawrkar-in Mizoram State Health Care Scheme (MSHCS) hnuaiah damlo bill pek theih loh Rs. 6,31,250,126 (cheng vbch sawmruk pathum, nuai sawm pahnih, singnga, za leh sawmhnih paruk) a nei mek a, hei hi November 30, 2022 thlenga mi 22,490 te MR bill sorkarin a bat tlingkhawm a ni, an ti a, Damlo bill pek an nih loh avangin damdawia inenkawl chhunzawm thei lo te tawrhna chu pawi an tih thu an sawi.

Congress chuan kum kallai meka Healthcare a inziaklut zawng zawng 39,505 atanga 56% chuang damlo bill a batsak mek a ni. RTI chhanna atanga a lan danin kum 2021-2022 leh 2022-2023 Financial Year kallai meka damlo bill te hi pek a la ni lo hrim hrim a. Hetianga kum 2 dawn damlo bill pek a ni lo hi Congress party chuan hriatthiam theihah kan ngai lo an ti.

Damlo bill bat mek dan:

Source: RTI Chhanna 14.12.2022

MSHCS hnuaia inziaklut damlo ten harsatna an tawhna chhan chu damlo bill pek hi Finance Minister leh Chief Minister ni bawk Zoramthanga ngaihpawimawh zawng a nih loh vang ni a an ngaih tih an thuchhuakah an tarlang.  Contractor tlemte te tana bill lakah harsatna a awm ngai lo, an ti a, damlo mi 22,490 te MR Bill tun thlenga MNF sawrkarin a la pe thei lo hi mipuite hriselna a ngaihthah vang a ti. "Tuna Healthcare bill an pek chhuah chak loh dan atanga chhut chuan kum 2023 MLA  inthlanpui kumah pawh damlo bill te hi an pe chhuak vek hman dawn lo tihna a ni a. RTI chhanna atanga a lan danin Healthcare tana Asian Development Bank (ADB) atanga loan an puk tur pawh engtikah nge an rawn pek dawn tih hriat theih a ni lo," an ti bawk.

MPCC chuan, "Zoramthanga kaihhruai MNF sawrkar hian mipuite hriselna a ngaihthah thin tih an sawrkar hmasak (1998-2008) a Falkawn Referral Hospital an tihchhiat dan atang khan a chiang tawh a. Tunah chhungkaw tam takin an thlamuanpui thin Healthcare an tichhe leh mek a, mipuiin rintlakah an ngaih tawh loh avangin MSHCS/healthcare a inziaklut pawh chhungkaw 39,505 chauh an ni," an ti.

 Hetiang hi kum hmasa lama MSHCS hnuaia inziah luh dan a ni:

Source: RTI Chhanna 22.7.2022

Congress party chuan sorkarna an siam (2008-2018) laiin mipui hriselna an ngai pawimawh thin, tiin Falkawn Referral Hospital tlu chhe tawh pawh a siam that bakah Medical College changtlung takah a din chhuak a, Mizo thalai tam takin MBBS an zir theih phah an ti. "Pathian leh mipui zarah Congress party in sorkarna a  siam leh chuan Healthcare hi changtlung takin, mipuite thlamuanpui thamin kan kalpui leh ang. Chumi tithei tur chuan mipui thlawpna kan ngen nghal bawk a ni," an ti bawk.