Kum 1997 atanga David Lalrinawma hriatrengna atana kum khat dana chess tournament neih thin, Mizorama local chess tournament ngaihhlut berte zinga mi chu kumin atang hian FIDE Rating tournament atan hlankai a ni dawn a, March 11, 2014 atangin Electric Veng YMA Hall-ah khelh tan a ni dawn. Mizoram Chess Association (MCA)-in hun eng emaw chen a lo kalpui tawh tournament hi level sang zawk kai chho turin MCA chuan All India Chess Federation (AICF) hnenah ngenna a theh lut a, AICF chuan June 2013 khan Rating Tournament ni turin a pawmsak. Heta tang hian MCA chuan hma lain Chess khawvela thuneitu sang ber, Federation International de Echeck (FIDE) hnuaia rating tournament Mizoram-in a thlenna hmasa ber ni turin David-a hriatrengna tournament hi a thlang. Hei vang hian tun hmain he tournament hi vawi riat lo khel tawh mah se, FIDE hnuaia rating tournament a nih tawh dawn avangin 1st David Memorial FIDE RATING Chess Tournament tih pawh a ni dawn ta a ni. AICF hnuaiah hian rating tournament hrang hrang a awm a; mahse, Mizoram-in rating tournament hi a la nei ngai lo. David Memorial tournament-ah hian AICF hnuaia player rating point 2000 leh a hnuai lam neite tan a tel theih dawn a, India ram state hrang hrang atangin he tounament khel tur hian chess player eng emaw zah kalkhawm tura beisei an ni. He tournament-a che tha player-te hian khawveal huap anga pawha rating point an hmuh dawn avangin Mizo player-te tan pawh rahbi thar duhawm tak a ni ang. (NB. Tunah hian world chess champion ni lai, Magnus Carlsen hian rating point 2800 vel a nei mek.) FIDE Rating tournament a nih tawh dawn avangin, he tournament hi AICF hnuaia registered player-te chauhin an khel thei dawn a, Mizo player AICF hnuaia registration tithar duh tan entry fee pek rualin Rs. 250 (naupang leh puitling) sengin a tih nghal theih bawk. He tournament hi qualified arbiter (referee) chauhin an endik dawn a, chief arbiter atan Kolkata-a mi leh deputy arbiter pahnih Guwahati leh Shillong atangin an lo kal bakah Mizoram atangin qualified arbiter pahnih-te’n an pui bawk ang. He tournament atan hian MCA chuan lawmmanah Rs. 1.85 lakh a sem chhuak dawn. Open category bakah under 15 leh under 11 category-ah te inelna buatsaih a ni dawn. Inelna category zawng zawngte hian anmahni category-ah theuh rating point an keng tel dawn bawk. MCA chuan a pum puia category hrang hrangah te lawmman a siam bakah hmarchhak chess player-te tan bik lawmman a siam tel bawk a, hmarchhak player-te mahni state aiawha che thate theuh hnenah lawmman an pek bakah, Mizo player che thate hnenah pawh a hranin, an chet that dan indawtin lawmman an pe tel bawk ang. Tounament hming put chhan David Lalrinawma David Lalrinawma hi Pu Thangliana (L), Ex-Minister leh Pi Vanlalchhuangi te fa pahnihna niin 6th Sept., 1961 khan a lo piang a, amah hi infiamna ngaina tak niin Shillong St.Anthony-a kal laiin Inter School football tournament (All India) team-ah pawh player-ah thlan niin, Subroto Mukherjee Cup-a Mizo naupang kal hmasa pawl a ni nghe nghe. Infiamna chi hrang hrang Hockey, Badminton leh Carrom te pawh a thiamin a tuipui em em a ni. Infiamna chauh ni lo, music lamah pawh mi tui mi tak a ni. Kum 1983-ah Lalzampuii d/o Aithuama Electric veng nen inneiin, fa 3 an nei a, chung te chu - Solomon Lalhminghlua, Lalhriatpuia leh Christy Lalnunpuii te an ni. Pu David-a hi a thih ni thlengin Electric Veng Chess Club-ah Treasurer a ni.