Aizawl November 10, 2024 : Cheng Vaibelchhe 42.83 senna tur Aizawl bazarpui (New Market)-a sumdawng 1,105-te lenna tur building sak mek, Aizawl City Centre chu tun thlengin zaa 55 (55%) sak zawh tawh a ni.

ZALEN thudawn danin Aizawl City Centre sakna tur atan hian November 16, 2022 atangin sumdawngte an inthiar chhuak tan a, hnathawhna tur hmunte hung a ni.

Aizawl Smart City hotute hnen atanga thudawn danin tun thlengin building sak hna hi zaa 55 thawh tawh a ni a, a theih anga chakin hmalakna kalpui mek zel a ni.

Aizawl City Centre sakna tur atan hian Urban Development & Poverty Alleviation (UD&PA) chuan September 22, 2022-ah LoA (Letter of Acceptance) a pe chhuak a, a sakna sum hi Smart City Mission atangin hmuh a ni.

A sakna atan Rs. vbc. 42.83 dah niin, project hming chu Modernisation of Bara Bazaar - Trade Facility - cum-Exhibition Area’ tih a ni a, design siam turin intihsiakna buatsaih a ni a, Catalyst Architecture thlan a ni.

Building hi block hnih (2)-ah then a ni a, a hnuai ber parking leh cold storage-a hman tur niin, parking-ah 2-wheeler 79 leh 4-wheeler 31 te a leng thei dawn a, Block A chu chhawng sarih tur a ni a, dawr 458 a awm ang a. Block B-ah dawr 647 a awm bawk ang a, Block B hi chhawng ngaa sak tur a ni.

UD&PA Department hnuaia Aizawl Smart City Limited-ten a sak hna an enkawl, Aizawl City Centre sak hna hi January, 2023-ah tan niin, November 30, 2025 a zawh tura ruahman a ni.