Aizawl January 22, 2024 : Synod Inkhawmpui 2023-in a rêl angin Delhi Pastor Bial thar chu January 21, 2024 (Pathianni) ah hawn a ni a. Bial thar hawng tur hian Synod O.M.-in a ruat angin Rev. R. Vanlalnghaka, Synod Moderator leh amah tawiawmtu Rev. PC Pachhunga, Synod Finance Officer te an kal a ni.

Delhi Pastor Bialah hian Delhi Kohhran, West Delhi Kohhran & Dehradun Kohhran te an awm a. North Delhi lamah zirlai rualte leh hnathawka awmte tan Inkhawmna hmun a awm bawk.

Nimin Chhun dar 12-ah West Delhi Kohhran Inkhawmah Moderator hian thuhril rawngbawlna a nei a. Tlai dar 4:30-ah Bial Station, Delhi Kohhranah Bial thar hawnna hun hmang lehin thuchah a sawi nghal bawk. Bial thar hawn programme-ah hian Delhi Kohhran Zaipawl leh West Delhi Kohhran Zaipawlten Pathian chawimawina hla an sa bawk.

Bial thar hawn Inkhawm banah hian Special Bial Inkhawmpui neih zui nghal a ni a. Inkhawm zawng zawngte pualin Bial thar hawn lawmna ruai theh zui nghal a ni.