Aizawl May 16, 2024 : Vawiin khan ZORO Gen.Hqrs buatsaihin Free Movement Regime (FMR) hlih duhlohna leh Mizoram leh Myanmar ramri hung duhlo inkhawm (peaceful rally) chu Zokhawthar, Tiau lui bulah neih a ni a. He huna MNF aiawha thusawitu Zodinpuia, General Secretary chuan Democracy ram ah mipui ngam an awm ngai lo tih a sawi.

He huna MNF aiawh a thusawitu Zodinpuia chuan, "Zofate inpumkhatna leh rorelna pakhat hnuaia kan awmho leh hi MNF beisei leh hmathlir a ni a, hemi tihlawhtling tur hian MNF chuan kum 1961 atanga vawiin thlengin hmalakna a la chawlhsan lo a ni," a ti.

Zodinpuia chuan, "India sawrkarin khawvel atanga Mizote min rawt chimih tumin kum 1966 ah Jet Fighter hial hmangin min bei tawh a, tunah unaute inkarah dai danna bang min siam hnan a tum leh ta. He hmalakna dodal tur hian Zofate kan tanrual a ngai a, Democracy ram ah mipui ngam an awm ngai lo a ni," a ti.

MNF General Secretary Zodinpuia chuan, "India leh Myanmar ramri hung tura India Sawrkarin hma a lak mek na hi MNF chuan ṭha a ti lova, a dodal zel dawn a ni, a ti a, Free Movement Regime (FMR) chungchang ah, zalen taka kum tamtak unau inkalpawh tawhte India sawrkarin daidanna bang chhah zawk hmang a min thendarh a tum hi MNF chuan pawm theih chi ah a ngai lova, he hmalakna hi a dodal tlat a ni," a ti bawk.

MNF sawrkar laiin ramdang atanga kan unau raltlante hmangaih taka lo kuangkuah thin an ni a, an laka sorkar laipuiin harsatna rawn siam a tum pawhin MNF khan huaisen takin a lo dodal mai thin. Biometric Enrolment nei tura central sorkar-in Mizoram sawrkar a rawn nawrna pawh MNF chuan a lo hnawl tawh a, tun hnaiah raltlan te tan Biometric Enrolment neih tir tumna a rawn awm leh niin an hria a, Mizoram sawrkar hian he thil hi MNF ang khan huai taka a dodal ngam an beisei, a ti bawk.