Aizawl January 27, 2024 : Nikum kha Mizorama dengue natna vei hmuhchhuah tam ber kum a ni a, dengue vanga thi mi pahnih an awm.

Health department chhinchhiah danin nikum khan dengue vei nia rinhlelh mi 12,949-te thisen endik niin hetah hian hri vei mi 2,060 hmuhchhuah a ni a, vanduaithlak takin mi pahnihin an thihpui.

Dengue vei leh vei lo enfiahna hi sawrkar pawm bik Elisa leh NS1 Antigen-a finfiah chauh a nih avangin hri vei leh thi hi hei aia tam an awm thei nia thudawn a ni.

Health department chhinchhiah danin kum 2013 atang khan Mizoramah dengue natna vei hmuhchhuah tan a ni a, dengue natna thihpui erawh kum 2022 atang khan an awm chauh a ni.

Chhinchhiah danin kum 2013 atanga January 21, 2024 thleng khan Mizoramah dengue natna vei mi 5,082 hmuhchhuah a ni tawh a, hri vanga thi mi pasarih an awm tawh a. Dengue natna thihpui hi kum 2022-ah mi panga leh nikumah pahnih an awm a ni.

Dengue natna vei hi kum 2022 atang khan an pung nasa hle a, 2022-ah hian positive mi 1,868 hmuhchhuah niin nikum khan positive 2,060 hmuhchhuah an ni bawk.

Kumin bikah hian January 21, 2024 thleng khan dengue hri kai mi 20 hmuhchhuah an ni a, kuminah chuan dengue vanga thi an awm hriat a la ni lo.