Aizawl: MZP Headquarters Kolasib chuan nimin khan Kolasib Press Club-ah chanchinbumite kawmin Kolasib DIET sum chetvel danah thil diklo tam tak a awm nia an hriat thu an sawi.
Kolasib district MZP President Zosangliana Rokhum chuan RTI hmanga zawhna an siam kum 2013-2018 chhunga In-Service Training neih tawh zat, In-Service atana Fund lut tawh zat, khawi school-te nge lo kal tawh tih leh Attendance Sheet an zawhna department lamin an chhanna ah thil dik lo tam tak a awm niin a sawi a. “Hall an hmanna hmun nia an sawi Diakkawn YMA Hall, Tumpui Community Hall leh New Diakkawn community hall enkawltute kan zawhna ah a enkawltute chuan hall an hman loh thu min hrilh a. Hei mai bakah attendance sheet atanga a lan danin ni 1-ah mi 1-in vawi 5 te, vawi 3-te training angten a lang a. Hei mai bakah hian Attendance Sheet-ah hian pension tawhte leh boral (thi) tawhte hming eng emaw zat a lang bawk a, an school lo thawh tawhna te pawhin mak an ti hle a. Chuvangin, chhui chiang turin February 28, 2019 khan ACB-ah FIR kan thehlut ta a ni,” a ti.
MZP hruaitute chuan, “Training-na sum chungchangah hian Directorate leh Kolasib DIET ten RTI zawhna an chhanna a inang lo bawk a, Directorate lama kan zawhna chuan ‘In-Service tan a hranin sum a awm lo’ an tih laiin Kolasib DIET chuan ‘In-Service training-na atan Rs. 2,527,341/- an dawng’ niin an tarlang thung a. “SCERT leh Kolasib DIET te min chhanna hi a inmil lo a, a khawi zawk hi nge rin tur tih hi kan hre lo a ni,” an ti bawk.