ZALEN September 17, 2023 : Drugs Controller General, India (DCGI)-in August 31, 2023-a damdawi chi khat, Digene Gel la kir tura thuchhuah an siam hnuah he damdawi ei vanga harsatna tawk Mizoram-ah an awm thu hriat a ni lo.

ZALEN-in Health department hnuaia State Drugs Control thawktute hnen atanga thu a dawn danin la let/kokir tur hian Mizoram district tina an officer-te chu an biala hma la turin an hriattir a. Hmalakna report kimchang erawh an la hre lo tih sawiin he damdawi hi kawl an tam lo nia an hriat thu an sawi. 

Damdawi that loh thu hriat a nih dan sawiin batch no pakhat, 510403D7 chu a hmangtuin a rawng light pink a ni a, a thlum bawk a. Mahse, batch thuhmun tho bur dang chu a rawng a var a, a kha-in a rim a chhe bawk tih a hria a, a complaint ta a. Chu complaint chu ngai pawimawhin a siamtu company-in an thil siam chu la kir (product recall) turin a ti nghal a, fimkhur thil zelah batch no dang zawng zawng, flavour hrang hrangte huam vekin an recall ta niin an sawi a. Taksa tana a pawi theihna hi chiang taka sawi a awm lo va, fimkhur thil vanga lak kir an ni tih an sawi. 

Damdawi lak let a tul chhan zawhna chhangin a siamtute hi an fimkhur a, an product-ah complaint a awm an hriat khan an sumdawnna kal zelah pawi thei dawn tih hriain recall an kalpui nghal niin an sawi a. “Genuine manufacturer hi chu an fimkhur thin khawp mai a, tuna mi pawh hi drugs control-in hma a lak hmaa anmahni hmalakna a ni a. Drugs control atanga hriat hmasak nise chuan an chungah action lak a ni ngei dawn a, hma an la vat kha an tifuh a. He product danglam bik an sawi hi engnge a nih chiah concerned state drug control-in an umzui zel ang a, an siam a ni thei a, mi dangin a lem (counterfeit) an siam a ni thei bawk a ni,” an ti.

Damdawi te DCGI emaw State Drugs Control ten an enfiah thin leh enfiah thin loh chungchang zawhna chhangin, “Damdawi zawrh chhuah turte hi zawrh chhuah a nih hmain ngun takin anmahni quality control laboratory-ah test lawk vek a ni thin a, raw-material, half finished leh finished product test thlap thlap tur a ni. Test paltlangte chauh zawrh chhuah theih a ni,” an ti. 

“DCGI/State Drugs Control hian an zawrhchhuah hma chuan quality a hranin kan enpui lo tluk a ni a, tul bik thilah erawh company atang pawhin sample lak a ni ve thin bawk. 
Manufacturing licence neia siam an nih avangin damdawi quality chu tha tura ngaih a ni ve phawt a, bazara a chhuah hnuah erawh drugs control hnapui ber chu damdawi quality tha lo dap chhuah a ni a, sample tam thei ang ber lak tur a ni,” tiin ZALEN zawhna an chhang.

Pum damdawi chungchangah hian August 31, 2023 khan DCGI chuan thuchhuah siamin Digene Gel siamtu, Abbott India Ltd., L-18/19, Verna Industrial Estate, Salcette, Goa - 403722-in Digene Gel an siam, hmun hrang hranga an hralh chhuah tawh chu batch pakhata complaint a awm avangin Digene Gel (Mint, Orange leh Mix fruits flavour) batch an kohkir (recall) tur leh siam chhuah pawh chawlhsan hrih turin an hriattir a ni.