Aizawl August 14, 2024 : Spl. Judge POCSO Act, 2012 leh District & Sessions Judge Aizawl ni bawk Helen Dawngliani chuan ni 13.08.2024 (Monday) khan Judgment ti chhuakin, Aizawl District khaw pakhata a fanu naupang kum 13 mi mipat hmeichhiatna hman khawlohpuitu chu pawngsual thubuaiah thiamloh a chantir.

Section 376(3) IPC hnuaia thiamloh a chantirna ah kum 20 chhung hreawm taka tang tur leh cheng singnga chawi turin a hrem a, pawisa chawi tur hi a neih loh chuan thla thum dang Lungin tan belh turin a hrem a ni.

He pawikhawihtu vek hi Section 6 POCSO Act hnuaiah thiamloh chantir a ni bawk a, hreawm taka kum 20 chhung Lungin tang tur leh cheng singnga chawi turin a hrem. Pawisa chawi tur hi a neih loh chuan thla thum dang tang turin a hrem bawk. Lungin tan tur hunchhung hi a ruala chhiar tura tih a ni.

He case pawi khawihna thlen hunlai hi kum 2020 kha niin vawikhat aia tam naupang kumtlinglo hi a pa in a pawngsual a, pawikhawihna hriat anih veleh Police hriattir an ni a, thubuai ngaihtuah chhungin Sawrkar lamin thuhretu 7 an nei a, thil tisuala puh hian thuhretu neih tul a ti lova, Court in a hrem ta a ni.