Aizawl: National Environmental Survey (NES) Programe hnuaiah India rama district zawng zawng tan environmental survey mumal tak nei vek tura ruahhman a ni a, GIS hmangin District Geo-Map buatsaih tur a ni a, Mizoramah chuan a hmasa ber atan Aizawl district-ah kalpui tan tum a ni.
District Grid Map hi sawrkar hmalakna hrang hrang leh mimal tan pawha chhenfakawm tak tur a ni a, environment chungchang pawimawh tam tak he Map hmang hian hriat zung zung theih turin chhawpchhuah a ni dawn nia thudawn a ni.
Tunhnai khan Aizawl DC Vanlalngaihsaka, IAS kaihhruaiin District Level Stakeholder Meeting neih a ni a, meeting-ah hian sawrkar laipui hnuaia Ministry of Environment, Forests & Climate Change (MoEF&CC)-in Environmental Information System (ENVIS) Scheme hmanga hma thar a lak mekte leh a hmachhawpte thlir hoin hmalâk dan tur zir hona hun hman a ni a, Dr. Lalramnghaki Pachuau, Mizoram Pollution Control Board-a Scientist 'B' leh Mizoram ENVIS Hub Co-ordinator ni bawk chuan heng programme hrang hrangte hi a sawifiah.