8th July: Mizoram Govt Doctors' Association (Mizoram Health Service) member-te chuan July ni 10 & 11, 2023 hian an hnathawhna hmun țheuhah badge dum an bel dawn. 

Sawrkar din, Addl CS Chairman na hnuaia sawrkar Dept hotu lawkte telna  'MHS Restructuring Committee' in kum khat kaltaa  recommendation a siam tawhte tun thlenga a la hlawhtlin loh avanga an lungawi lohna entirna atana black badge hi bel an dawn a ni.

Committee-in a recommend tawhte chu tihlawhtling thuai turin sawrkar an ngen a. Sawrkar atanga hmalakna lawmawm an hmuh loh chuan July ni 13 - 15, 2023 hian sawrkara thawk doctor zawng zawngin mass casual leave an la zui ang. 

Mizoram Health Service hmasawnna tur atana thil țul zualte chu sawrkarah MGDA in chuan an thlen thin a, an beisei ang hmalakna engmah a awm loh avangin Feb 2022 ah lungawi lohna lantir an tum a. Sawrkarin MHS Restructuring chungchang ngaihtuah turin ni 17.2.2022 khan Committee a din ta a ni. Chairman-ah Addl CS niin Member Secretary atan Secretary, DP&AR a ni a. Member-te chu Principal Secretary, Finance  leh Secretary, H & FW an ni. Thla thum chhunga recommendation thehlut tura tih an ni.

"MHS Restructuring na tura MGDA thil phut leh Committee-in a recommend takte hi hlawh tihsanna lam tur thu a ni hauh lo a. Sawrkar tha tichak tura post siamrem (convert) te, thuneihna inkhaidiat tihdikna te, post awm si loa mihring awm sa site tana post thar siamte an ni ber. Sawrkarin sum a sen belh a ngai a nih pawhin, Zirchiangtu Committee te ngei sawi danin, 'negligible' a ni, sawrkar pachhiat rawk rawkna thlen tur thil a ni lo," tiin kan thudawnna chuan a sawi bawk a.

Thudawn danin July 2022 khan nawrh an tum a, sawrkar hotu ten nuar lo tura ngenin, August thla chhungin engkim an peih tur thu a tiam avangin lungawi lohna lantir ta loin an nghak ta a. Committee sangin uluk taka a zir hnu chu DP&AR in 'kan zir chiang mek e' tiin kum khat zet an khal zui leh ta a. May ni 18, 2023 a Cabinet meeting-a ngaihtuah turin put luh niin  Dy CM chuan MGDA conference ah, "Cabinet ah kan rawn pass mai dawn e," a tih avangin Cabinet thuchhuak an nghak a, cabinet meeting awm leh veleha ngaihtuah turin a dah leh ta a ni.

Hemi hnu hian MGDA hruaitute chuan Dy CM leh Health Minister te dawrin rei lo te chhunga tihfel theih a nih thu a an chhan avangin  an nghak leh ta a. Thla khat leh a chanve hnuah Finance Dept la thleng lovin a hmaa kum khat study tawhtute (DP&AR) tho khan an la kawl mek tih an hria niin thudawnna chuan a sawi.

"Committee sangin a study fel vek tawh, tihhlawhtlin theih tur nia a hriat chin sawrkara a recommend tawh, May 2022 a sawrkara a thehluh tawh kha DP&AR in kum khat chhung a study nawn leh kha a lungawithlak loh hle tawh a. Cabinet-ah, a nghawng tur sum sawi tel miah loa agenda a an chhawp chhuak thei țawk kha a mak hle a ni. Cabinet in a pass thei lo ang tih hre reng chunga chhawp luih a ni hial em ni? Kha kum khat chhung khan engati nge a financial implication zawng zawng nen an lo zir zawh hman loh? Cabinet-in, financial implication nen next Cabinet a ngaihtuah tur a tih atanga thla khat leh a chanve a liam leh tawh hnuah pawh Finance Dept a la thleng lo a, ngaihtuah a la hlawh lo hi a mak hle a ni," tiin thudawnna pakhat chuan a sawi bawk.

MGDA Emergency General Body meeting, ni 5.7.2023 a neih chuan, an service hmasawnna tur sawrkar hian ngaihtuah duh tak tak loin a tikhawtlai kual vel mai mai niin a ngai a. Sawrkar din committtee sangin recommendation a thehluh zawng zawngte chu a rang thei ang bera a zavaia tihhlawhtlinsak turin sawrkar an phut tlat a ni.