ZALEN August 21, 2024 : CM Bangla thlang/Thlithaw veng leimin avangin Dawrpui Vengthar-a PC Sapnela (L) te kawmchar C. Lalchhuanawma vawk vulhna hmun leh Changliana (L) leh 7th Day (SOG) inkar chu a hnawl a, Nizan dar 10 pelh hret khan a min a, leivung leh chirh diak a chhawp a, he lei tawlh avangin hian chhungkaw 10 lai an inthiarchhuak tawh.

Hranglawta te In hlui luahtu hnamdang cement mistiri te chu a zan la la khan an inthiar chhuak nghal a. Vawiin chhun ruah sur khan a ti tawlh thla a. C.Lalchhuanawma te vawk in hnawl thla in, chirhdiak karah vawk chhan ngam mai pawh an ni lova, tun thleng hian lei a la tawlh reng a ni.

Tlai lamah a bul hnai a chengte bungraw thiar chhuah hnatlang koh a ni a. Khawchhe hnuaiah an thawkchhuak a, bungraw thiarchhuah hnuah, chirhdiak kara vawk senghawi hna thawh chhunzawm a ni.

Inthiarchhuak te:

1. Hranglawta te inluah: hnamdang chhungkaw 4.

2. Varliankunga te inluah: chhungkaw 4.

3. Lalchangliana (L) te inluah: chhungkaw 1.

C.Lalchhuanawma te vawk 18 ah a puitling 4 an chân a ni.

Chenna in chhuahsan ngai te hi thenawm khawvengin an eitur te an buaipui sak a, riahna tur mumal awm lo chu an buaina a ni rih. Zarkawt Local Council te pawhin a hmunah an enpui a, a minna bulthut lamah theihtawp a hmalak chhunzawm an tum thu leh hmalakna kal mek a nih thu an hrilh.

DM&R lam atangin QRT ten an tlawh tawh a, dinhmunah ruah a la tlak reng avang leh lei a la tawlh reng avangin hmalak a har thu te, luikawr mumal sial a ngaih thu an hrilh a ni.