Aizawl September 22, 2023: Vawiin khan Vanapa Hall-ah hmeichhiate venhim leh an dinhmun chawikan kawnga hnathawk tha chawimawina, Zakapa Award, 2023 hlanna inkhawm buatsaih a ni a, Dr. Lalrinawmi Ralte, Tlangnuam hnenah he Award hi hlan a ni. 

Social Welfare & Tribal Affairs Department ten Awrad hlanna an buatsaih hi Chief Minister Zoramthanga chuan khuallian niin a hmanpui a. Dr. R. Lalthangliana, Minister, Health & Family Welfare pawhin a telpui. Chief Minister hian lawmman; thuziak (Lehkhapui) leh pawisa fai Rs. 100000 (nuai khat) chu Dr. Lalrinawmi Ralte hnenah hian a hlan a ni.

Lawmman dawngtu tur an thlan dan leh a dawngtu Dr. Lalrinawmi Ralte chanchin tawi Zoramthangi, Director, Women & Child Development leh Member Secretary, Organising Committee chuan a sawi a. Tehfung pawimawh tak tak sawm an neih thu a tarlang a, chu tehfung atang chuan a dawngtua an thlan tak Dr. Lalrinawmi, Tlangnuam hi a rawn lang fiah hle a ni, a ti. Dr. Lalrinawmi Ralte hian Mizoram pawn lama Mizo hmeichhia harsatna tawk te chhanchhuahna hna vawi tam tak a lo thawk tawh thin a ni.

David R. Lalsawmtluanga, Member, Organising Committee chuan lal Zakapa'n kum 1891 kumtir lama South Lushai Hills Superintendent CS Murray-a'n Khawhri khuaa nula a phutna huaisen taka "Kan hnam dan a ni lo" tia a lo hnial dan leh an indo zui dan chanchin tawi sawina a nei. Zakapa hi Fanai lal Dokhama, Sailulak lal fapa niin 1839 ah a piang a ni.