Aizawl : Champhai North bialtu MLA Dr. ZR Thiamsanga, Covid-19 Medical Operational Team Chairman leh Vice Chairman, Health & Family Welfare Board nibawk chuan nimin khan a bial chhung Myanmar ramri dep khua VLTF te leh ramri hrula rammu te a hmunah kalchilhin a tlawh a, lawmthu sawiin an mamawh ang te a pe.

Dr. ZR Thiamsanga chuan, "Covid-19 hripui beihlet hna chu department pakhat kutah chauh nghah chi a ni lova, kan zavaia tanrual a ngai tak meuh a ni. Lungrual taka kan thawhhona avang chauhin tun dinhmun hi kan thlen theih phah a ni, Mizo khawtlang nun chu inpawhna tha tak, then-awm khaw veng inlenpawha inkawm nasa tak kan ni a, he natna inkaichhawn awlsam tak a vei tam zawkah pawh lang mai lo Covid-19 hripui hi kan khawtlang tana hlauhawm tak a ni," a ti. Covid-19 laka kan him theihna turin kawng hrang hrangah DLTF leh VLTF hmalaknate chu fakin theihtawp chhuah zel turin a ngen.

Dr ZR Thiamsanga chuan vawiin hian Champhai Zote, Ngur, Vapar leh Murlen khuate tlawhin VLTF-te a kawm bakah ramri hrula rammu mek Fartlangkai leh a chhehvela duty-te a hmuna kalchilhin a tlawh bawk. VLTF leh Tiau kama duty-te chuan Champhai North bialtu MLA leh Covid-19 Medical Operational Team Chairman nibawkin hun hlu tak senga a hmuna kalchilha a tlawh avangin lawmthu an sawi.