Aizawl May 7, 2023 : MNF Media & Publicity Department chuan Ramhlun South YMA Y-Section In sak mek chhunzawmna tur tihfel tawh chu ZPM huamhauh lutuk avanga cancel leh a tul phah tiin pawi an tih thu an sawi. ZPM-in an duh ang thlapin pawl thianghlim YMA thuchhuah an siam tir an ti a, Dr. Vanlathlana chu ZPM leader Lalduhoma nen an tehlkhin bawk.

MNF chuan, YMA meuhin an thuchhuahah ZPM Ramhlun South Unit Ill-in MLA fund an hmuh thu hi an tarlang a, MLA Fund Party unit hnena pek hi dan kalh a ni: Mipui hriata a tlangthan tak avanga a cancel leh hian, an Leader Lalduhoma zin loh bill la, mipuiin an hriatchhuah hnua pe let nen khan a inang rengah kan ngai a. Dr Vanlalthlana hi Chief Ministerial candidate nen hian an inchhun fuh hlein kan hria a. ZPM kalphung thar zawrh mek hi a makin hriatthiam a har a, kalphung thar tha lo tak niin kan ngai a ni," an ti.

MNF Media Department te chuan, "ZPM-in an hmaibal phih nan pawl thianghlim YMA an hmang leh chumi hnua an In sakna tur chhunzawm theih lova cancel a ni ta hi a pawi kan ti hle a ni. Hetiang a nih avang hian Ramhlun South YMA Y-Section in sak mek awh chhunzawm lohin a awm phah a. Bialtu MLA hian ZPM Party hnena percent pe kual lo hian a rang thei ang berin Ramhlun South YMA Y-Section hi an In sakna tur a pek thuai kan phut a ni," an ti bawk.

ZPM Thalai chuan June ni 2. 2023 khan thuchhuah siamin June ni 1-a MNF Press Conference thu leh hla chu mimal inbeihnaa an ngaih thu leh thu belhchian dawl lo a nih thu an sawi a. Hemi chungchang hi chhang letin MNF chuan, "An thuchhuahah khan, Pu VL Krosshnehzova'n Ramhlun South YMA Y-Section hna chungchanga Dr. Vanlalthlana a beihna pawh hi hre reng chunga mimal inbeihnaah ZPM Thalai chuan a ngai a, kha thilah khan file a kal thui hmain Dr.Vanlalthlana hian a cancel vek a ni," tih an ziak a.

MNF chuan ZPM thuchhuah chu chhangin, "Ramhlun South YMA Y-Section in sak mek chhunzawmna tur tihfel vek tawh ZPM huamhauh lutuk avanga cancel leh a tul ta hi a pawi hle a. ZPM-in an duh ang thlapin pawl thianghlim YMA chu thuchhuah an siam tir a. An thuchhuah siam tirah chuan "ZPM, Ramhlun South Unit III te chuan Vengchhung hmasawn nana MLA fund Rs 2,50,000/- an hmuh chu Ramhlun South YMA, Y Section In sak mek sak chhunzawm nan min hlan a ni. Tin, hemi sum atang hian Rs 30,000/- (12%) chu ZPM Ramhlun South Unit III te hnenah Ramhlun South Branch YMA, Y-Section chuan lawmthu sawi nan hlan let a ni," an ti a. ZPM-in YMA hnena pawisa an dil leh percent an la ve ringawt tur hi khawtlangah sawi neuh neuh a awm takah chuan an inthlahrung leh si a, a ruk thei ang berin an cancel leh ta zawk a ni," an ti.