Mi in lehkha sang tak a zir a; mahse, hna hmu turin tih tur tam tak a la nei, mi thiam fal bik a nih a, an zir chhuah hlim atanga sawm nghal an awm. Heng hi hi chu mi bik an ni, mah se, hengho hi chu zaah pakhat pawh an awm lo. Sawrkar a ni emaw, company a ni emaw, hna hmu tur hian hmabak tam tak a awm thin a, lehkha thiam hna hmu mai lova tei mai mai pawh an kat nuk. Motor khalh thiam motor khalha eizawn tum erawh hi chuan hna an haihchham lo. Motor khalha eizawnna hi India sorkar laipui lam pawhin a pawimawh zia leh mamawhna san zia hria in, National Skill Development Council hnuaia ‘Job role’ za hnih chuang a duan zinga Automotive Skill Development Council hnuaiah ‘driving’ hi telh a ni. He zirna kalphung anga zirchhuak, National Vocation Training Centre atanga, certificate nei thei, Level 3 zir chhuakte hi matric tlukpui niin, Level 4 chin phei hi chu Pawl XII tlukpui a ni. Mizoramah erawh hei hi kalpui a la ni lo thung. Sawrkar laipui hmalakna ang chuan heng lirthei khalh zirte hi an zir man an tumsak vek ang a, an thiam hnu thla thum chhung chu thla tin cheng 1,800 dawng tur an ni bawk. Aizawlah hian driving school hi sawi tham lek a awm a, heng ho hian eizawng tlaka motor khalh thiam engemaw zat an chhuah thla tin a, mi tam tak eizawnna kawng thui tak an hawnsak. Zir chin a inang lo a, thiam chin pawh a in ang lo, driving school chhuak tam zawk tan erawh hi chuan eizawnna kawng thui tak a inhawng nghal. Mahse, a ni tela motor za chuang punnaah hian driver tha chhawr tur zawng an awm reng. Driver thawk nghet hlei thei lo an awm rualin, driver hna thawh tur thawk seng lo khawpa sawmtu ngah an awm ve bawk a, mihring azirin an hlawh zat pawh a inang lo thluah. Motor khalh zir tam zawk hi chu eizawnna atana hman tum an ni a, chutihrualin khalh thiam tum hrim hrim pawh an tam a, mipa chu sawi loh, hmeichhe zingah pawh motor khalh zirna pan hi an thahnem viau. Ke pali nei piah lamah two-wheeler khalh zir engemaw zat an awm bawk a, kum 70 tling tawh thlenga scooty khalh zir te pawh an lo nei tawh thin. Mizoram-ah driving school te hian kalphung fel tak neiin zir man bithliah an nei a, lirthei khalh zirtir man hi a hniam berah cheng sing khatah an bituk a; mahse, a zir man san lamah erawh bituk a awm lo thung. Driving school hrang hrangah hian tih dan erawh a inang lo hret hret a, kum 40 chin zirtir man la sang bik te an awm laiin, a hrutrual pawl an awm a, lirthei ke pali nei zir man tisang pawl an awm laiin, two-wheeler zir man nena inang renga chhiar an awm bawk. Heng zirna In te hian an zirlai te hi an khalh thiam hma loh chu an zirtir tlang pui a, zir tluantling peih lo tan zir man pek tawh lak let theih a ni lo. An zirlaite hi license an neih thleng an pui tlangpui bawk. National Vocation Training Centre atanga certificate nei thei tur test nei tur hian Mizoramah tum li exam buatsaih tum a lo ni tawh a; mahse, heng test-ah te hian inlan pakhatmah an awm lo. Mizo zingah mai ni lo, North-east hrim hrimah hian hetiang test endik thei pakhat chiah an la awm a, Advance Driving School neitu Lalnunthari Varte pasal Laltanpuia Varte hi a awmchhun niin, ani hian Tripura, Meghalaya, Assam-ah te exam hi a lo buaipui tawh thin a, Mizoramah hian tum li exam hi neihpui tura tih a ni tawh a; mahse, sorkar laipui lama zirlai hming pek luh, he exam hmachhawn tura tihte chu tumah an inlan lo?