ZALEN August 27, 2023: Dubai atangin Mizo housemaid mi 11 vel India ramah thawn haw an ni tawh a. He thil thleng chungchang hi police-ten an chhui chiang mek.

ZALEN-in Dubai-a Mizo awmte hnen atanga thu a dawn danin housemaid 11 chu India-ah thawn haw an ni tawh a. Tun dinhmunah Indian Consulate/Embassy-ah nula pathum awm mekin Mizoram haw duh, la lak chhuah theih loh mi 30 vel an awm niin an sawi.

Lakchhuah theih loh mi 30 vel an awm chhan zawhna chhangin Dubai-a Mizo hnathawk pakhat chuan, “Heng laiah chuan mi compound-a va luh ngawt te, mi chhawr lai va laksak ngawt te kha a theih loh. Indian High Commisioner pawhin dan ang thlap lo chuan lak let theihna a nei lo a, an tlan chhuak hlauh a, pawnah an awm a nih erawh chuan kan lam thei a. Indian Embassy-a an tlan luh hman chuan umzui mah se, a chhawrtu ten an lalet ngawt thei tawh lo thung a ni,” a ti.

Dubai-a thawk thenkhat chu chhanchhuah pawh tum mah se, a buaithlak nia sawiin, “Dubai-a Mizo housemaid-te hi naupang tete, kum 2000/2003 chho vela piangte an ni a. Tawng an thiam loh chu thu hran, passport an nei lo va, India khua leh tui an nihna tur ID proof an nei bawk si lo a. Mizo nulate hi Thai, Chinese, Philipino te nen hmel a inang vek tawh si a, embassy tan pawh mahni khua leh tui an ni tih hriat loh lo hum kha buaina tam tak thlentu a ni thei ni,” an ti.

Dubai atanga mi pakhat thawn haw tur hian thla khat chhung vel te buaipuia thil tihfel a ngai niin an sawi bawk.

Dubai-a Mizo nulaten harsatna an tawh chungchangah hian mi thahnemngai ten agency-te chu a mawhphurtu nia ngaiin police-ah FIR an thehlut a. He thil thleng chungchang hi chhui zui mek a ni tih Aizawl SP chuan ZALEN a hrilh.