Aizawl: Aizawl khawpuia in leh lo nei lo leh khawsak harsate tana din, khawpui chhunga chenna in nei lo tana sorkar laipui hmalaknaa sak, Basic Services for Urban Poor (BSUP) scheme hnuaia mi, Durtlang Ramthar Venga din BSUP Complex building chungchangah hmawr bawkna a la awm hlei thei lo a, leilung chinchang buaipuitu, Department of Geology & Mineral Resources (DG&MR) chuan heng building sakna hmun pali atang hian Lawipu-a an hmun bak an endik loh thu ZALEN an hrilh.

Tun hnaiah Aizawl chhehvela BSUP building complex hmun pakhat chu khuarel chhiatna avangin a chim a, nunna chân bakah hliam an awm a, building chungchangah hian sawi tam tak a awm a, a zavaia a him leh him loh erawh sawi theih mai a la ni lo niin, ZALEN chuan thu a dawng.

Durtlanga BSUP buiding complex sak dawn hian a enkawltu Urban Development and Poverty Alleviation (UD&PA) chuan an rawn lem lo niin DG&MR lam chuan an sawi a, Aizawl khawpui chhunga in sak chungchanga thuneitu, AMC lam pawhin a hmunhma hi endik turin an ti lem lo niin an sawi bawk. AMC hian an dan neih ‘side development and slope modification rules 2007’ ang chuan Durtlang Ramthar venga BSUP building an saknaah hian an rawn kher a tul lem lo, niin DG&MR lam chuan ZALEN an hrilh.

In sakna hmun hi hmun awih a ni hran lo a, AMC rules ang chuan leilung awih zawng hi 45 degree a tlin loh chuan DG&MR phalna hi lak kher a ngai lo a, hei vang hian In satu lam pawh hian department lamah hian phalna an la lem lo tih a sawi.

Hetihrual hian DG&MR lam chuan In hmun him leh him loh hi a awih zawnga teh chi a nih lem loh thu ZALEN an hrilh a, Tun hnai chhova lei chet nasatna, Hunthar leh Ramhlun Sport Complex te pawh a hmun awih zawng atanga teh chuan 20 degree vel bak a nih lo thu an sawi. Tui awmna hmun te, lei nghet lo chi te, pialtlep hmun a ni em tih te hi endik a ngai zawk an ti a, In sakna tur hmun a awih zawng atang ringawta AMC-in tehna an nei chu a fuh tawk lo an ti. Hemi chungchang hi a thuphung chuan an sawi tawh thin tih an sawi a, mahse, hmalakna tak tak a la awm lo niin an sawi bawk.

BSUP building hi Rangvamual, Hunthar leh Lawipu-ah sak a ni bawk a, mi engemaw zat an lawi lut tawh. Lawipu hmuna BSUP building sakna hmun bak hi endik a ni lo tih DG&MR lam chuan an sawi a, he lai hmun hi tunah rih chuan a him turah an ngai a, mahse, a bul hnai velah lung lakna a awm nual avangin che ve thei a nih thu an sawi.

BSUP Durtlang chu chhuahsan vek tura D.C.in order a chhuah angin inthiar chhuah tan a ni a, Zirtawpni khan chhungkaw 9 inthiar chhuakin Rangvamual-ah 7, Edenthar-ah 2 an awm thla tawh, Nimin pawh khan chhungkaw eng emaw zat an inthiarchhuak leh. Tun dinhmunah helai building hi awm zui tlakna a ni ang em tih sawi theih a la ni lo a, nimin lamah ruah a sur leh avangin duh angin hna an thawk thei lo tih DG&MR Joint director H. Lalbiakkima chuan ZALEN a hrilh.