Aizawl: Deputy Chief Minister Tawnluia chuan nimin zing khan PWD in PCC Flooring hmanga an siam, Vaivakawn atanga Bazar Bungkawn chhuahna kawngpui, Metre 787 a thui a hawng.

\ Hawnna thu sawiin Dy. CM Tawnluia chuan, “Kawng thar hian Vaivakawn atang Dawrpui pan hunchhung a tih tawi bakah veivak te tan sum sen a ti tlem zawka, rikrum thulha damdawi In panna atan phei chuan a pawimawh tak zet a ni,” a ti. Dy. CM chuan Chief Minister Zoramthanga hmathlir lo neih tawh angin a theih chin chinah a tlo thei ang ber tur ngaihtuaha kawngpui te siam a ni zel dawn tih a sawi a. “Aizawl khawpui chhunga lirthei tawt lutuk avanga harsatna sutkian tumin sawrkar chuan theih tawpin hna a thawk mek a. Vaivakawn leh Bawngkawnah te Traffic tawt lutuk sutkian nan Flyover siam turin sawrkarin bul a tan tawh a. UD&PA hnuaiah tho Aizawl khawpui chhunga kawngpengthuam 14 leh district khawpui a kawngpengthuam lian deuh te nawr zauh tum a ni a. A siamna tur sum vaibelchhe 10 pawh kan nei tawh a ni,” a ti bawk.

RD Minister leh bialtu MLA ni bawk Lalruatkima pawhin thu sawiin kawngpui thui lo tak, Aizawl khawpui chhunga pawimawh ber pawl ni si chu tlo tur anga bera hisap siam a ni ta chu thil lawmawm tak a ni a ti a. A siam hna thawktu leh a tawiawmtu chungah bial chhung mipui leh Aizawl tlak lam mipuite aiawhin lawmthu a sawi a ni.