Aizawl: Nimin zing khan Deputy Chief Minister Tawnluia chuan Zarkawt a tlawh a, Zarkawt veng tlaklam kawng sial dan tur 'valley road' a enfiah.

Zarkawt veng tlaklam ‘valley road’ hi khampang per pheia awm a nih avangin kawng sial dan tur pangngaia tih theih a ni lo a, January ni 20-ah Department Engineer-te a enfiahtir tur thu leh hnathawh dan tur ruahmanna siamzui a nih dawn thu a sawi. Dy. CM hian Aizawl Electric veng thlanmual thar tur panna leihlawn dawhkaina tur pawisa pawh sorkarin a ngaihtuah tawh thu leh department approval a awm tawh thu a sawi a. Chanmari leh Chanmari West inkara kawng pawimawh ‘Ramlai Road’ titlang tura mutan lian ber, building pakhat vanga sial tlang theih loh chu, a building leisakna tur leh a LSC engkim buaipui fel a nih thu te, kawng sial tlangna tur cheng nuai 30 dah fel a nih tawh thu a sawi bawk.

UD&PA changtu Deputy Chief Minister Tawnluia chuan, "AMC term dinglai a tawp dawn khan term pawhsei a theih tawh loh chungin, Department lam hotute chuan Covid-19 boruak vangin AMC term pawhseina tur dan siamthatna (Ammendment) a tih theih thu min hrilh a. State sorkar fawng chelhtu kan nih vang maia term pawhseina tura dan siamthat kha tul kan ti lo a, fair tak leh thianghlim taka inthlanna neih kan duh zawk a ni," a ti.