East Jerusalem-a synagogue-ah mi pasarih kah hlum an ni a, hetiang beihnaah mi an thih tam ber tum a ni a. Mi pathum velin hliam an tuar bawk.

He thil hi Neve Yaakov venga Zirtawpni zan dar 20:15 (India-a Inrinni zing dar 12:45) pelh hnua thleng a ni.

Police chuan mi kaptu hi ‘mi firfiak’ tia sawiin an ‘kah hlum’ ve thu an sawi.

Tualchhung chanchinbute chuan East Jerusalem-a cheng ve tho Palestinian pa a ni tih an tar lang bawk.

A hmunah hian Israeli police commissioner Kobi Shabtai chuan ‘tun hnai kum eng emaw zat chhunga inbeihna kan hmachhawn lian ber’ tiin a sawi.

Juda chen tamna hmuna thlengah hian Israeli-te chuan Jewish Sabbath intan mekah  synagogue-ah hian inkhawm turin an kalkhawm tan mek a, silai a puah hnuah hian an tlanchhia a. Police chuan officer-ten an kap hlum ve tih an sawi.

Forensic team chuan car var, silai hmet puaktuin a khalh ni ngeia hriat chu an endik zui nghal.

Palestinian hel pawlte chuan he beihna thleng hi an fak a, hetih rual hian an member-te tih a nih thu erawh an sawi lo.

West Bank leh Gaza Strip-a cheng Palestinian-te pawhin lawmin kawng an zawh a, chithlum an sem bawk.