F Mizoram PWD chuan kawng kilometer 5745.879 an enkawl mek a, heng zinga km 4020.918 hi black top tawh niin a dang km 1724.961 hi black top loh a la ni.
Tunhnaia tihchhuah ‘Public Works Department annual report 2017-2018’ tarlan danin Mizoramah kawngpui km 7237.694 a awm mek a, heng zinga km 5745.87 hi state PWD enkawl a ni a, kawngpui dang enkawltute hi BRO-in km 896.315, CPWD-in km 175.600 leh department dang enkawl km 419.900 te a ni a. Mizoram kawngpui zinga km 5226.043 hi black top tawh a niin black top loh km 2011.651 a awm bawk.
Sawrkar laipuiin mihring 250 aia tam khawsa khuate kawngpuia pawh vek tura ruahmnanna a siam 'Pradhan Mantri Gram Sadak Yojana (PMGSY) hnuaiah motor kawngpui lian la nei lo khaw 253 te inkalpawhna siam tum a ni a, heng khuate hi ami cheng tam dan a zirin ngaih pawimawh tur (priority)-ah dah niin mihring 1000 aia tam chenna khua 32, mihring 500-999 chenna khua 105 leh mihring 250-499 chenna khua 116-te a awm mek a ni. PMGSY sum hi a tirah chuan 100% hi central tum a ni a, mahse kum 2015-16 khan a kalphung hi thlak danglamin central-in 90% leh state-in 10% te a tum ve tawh tura tih a ni.
Mizoramah PMGSY kalpui tan anih atangin kawng km 3790.48 laih tawh a niin khaw 198 in an hmang tangkai tawh a ni.
Aizawl khawpui a kawng te enkawl tur hian Aizawl Road North division leh Aizawl Road south Division te siam a niin an ni hian black top kawng km 253.656 leh black top loh km 43.754 te an enkawl mek. India in khawchhak ram te nen insumdawntawnna tura kawngpui a sial mek, Kaladan Multi Modal Transit Transport Project (KMMTTP) hna chu thawh mek a niin December 2019-ah chuan zawh hman tum a ni.
Mizoram PWD hnuai-ah hian thawktu (post) 2168 awmah thawktu 1261 an awm mek a, hnaruak hnawhkhah loh 907 a awm bakah Workcharge hnathawk 391 leh Muster Roll thawktu mi 991 an awm mek bawk.