Khawvel hmun hrang hrang han thlir ila hmanlai ata vawiin thlenga buaina chhuah tam chhan ber chu hnam leh hnam inkara buaina a chhuah thin vang a ni a. Israel leh Arab ramte hi engvanga indo nge an nih kan tih chuan hnam pahnih inkara inngeih lohna vang a ni a. Chutiang zelin hnam bil chawi­lenna hmunah chuan buaina a chhuak zel a, a nghawng chu mi tam tak thihna a ni.

Kan then­awm maiah pawh han thlir ila, engvangin nge buaina a chhuah kan tih chuan hnam leh hnam inkara innghirnghona vang a ni a. Manipur state-a buaina chhuah chhan pawh Meitei leh tlangmi inkara buaina vang a ni a, a nghawng chu nunna tam takin a tuar a, thisen a luang nasa hle anih kha. Mi tam tak hlauin an tlan­chhia a, in leh lo tam tak tih chhiat a ni bawk. Chutiang zelin Myanmar lama kan zo hnahthlakte inkahna leh buaina thlen chhan pawh chi bil intihbikna vang bawk a ni.

Kan thenawm ram hrang hrangte hi han en ila, chi bil intihbikna avangin an buai deuh vek emaw tih mai tur a ni a. Hetih lai hian Mizoramah erawh chuan chi bil chawi lansarh tumna a awm lem lo a, Mizo tihah kan lungawi mai a. Hei hian buaina thleng tur lakah min chhan hle. Heti hian lungawi lovin Hmar, Paite, Pawi, Chhakchhuak leh hnam dangte hian mahni chi bil theuh chawilar tum ila chuan kan chan tur chu buaina a ni.

Mizote hi hnam dangte ngaihtuah chuan kan la tlem hle a. Chu a chhapah thendarhin kan la awm zui leh nghal a. Myanmar lama awmte chu Chin tia koh an ni a, Manipur lamah lah Kuki-Zo tiin min hria a, Mizoramah chuan Mizo tih kan ni. Eng ang pawhin hnam dang­te hian min ko mahse chhul khat kual, thlah khat kan ni tih hi pawm tlangin hnam hrang hrang laka inchem­harna hi awm lo se a duhawm hle. Chuti ni lova chi bil te tea kan inlahrang dawn anih chuan kan ropui lo hle ang. 

Vanduaithlak takin tun hnaiah chi bil inlakhran tumna leh mahni hnam chawisan tumna hi a awm chho ta lek lek mai a, hei hi kan chhehvel zo hnathlakte atanga bultan niin a lang a, a pawi tak zet. Mizoram pawna cheng kan unaute hian hetiang chi leh chi inkara buaina thlen thei hi chu rawn pu lut lo hram rawh se. Chubakah Mizoramah kan khawsa anih chuan mahni hnam bil tawng kher hman tum lovin Mizo tawng kan tih mai 'Duhlian tawng' hi hmang hram hram ang u, hei hian inpumkhatna a siam bawk. Khawi hmunah pawh awmin eng tawng pawh hmang mah ila thlah khat leh unau kan ni tihah hian lungawi mai ila, chu chu buaina pumpelhna tur a ni tih i hre thar leh ang u